WHO yapigia chapuo matumizi ya Usafiri wa Baiskeli duniani

WHO yapigia chapuo matumizi ya Usafiri wa Baiskeli duniani

Shirika la Afya Duniani WHO, limetoa wito mpya kwa nchi zote duniani kutumia baiskeli kama njia muhimu ya kukuza afya, kulinda mazingira na kuendeleza maendeleo endelevu, wakati dunia ikiadhimisha Siku ya Baiskeli Duniani leo.

Siku ya Baiskeli Duniani ilianzishwa na Baraza Kuu la Umoja wa Mataifa mwaka 2018 ili kutambua baiskeli kama chombo cha usafiri “rahisi, nafuu, cha kuaminika na kisicho haribu mazingira.”

Azimio hilo, lililoletwa na Serikali ya Turkmenistan, linatambua mchango wa baiskeli katika kuendeleza malengo ya maendeleo endelevu (SDGs) kupitia usafiri safi na jumuishi.

WHO imesisitiza kuwa baiskeli ina nafasi muhimu zaidi hasa baada ya janga la coronavirus”>COVID-19, ambapo miji mingi duniani inatafuta mifumo ya usafiri iliyo na uimara zaidi na isiyochafua mazingira. “Kutumia baiskeli kunapunguza uchafuzi wa hewa na msongamano wa magari, huku kukisaidia afya ya moyo, kupunguza hatari ya magonjwa kama saratani na kisukari, na kuboresha afya ya akili,” imesema WHO.

Azimio la pili latoa msukumo mpya kwa usafiri wa baiskeli

Mwaka 2022, Umoja wa Mataifa ulipitisha azimio la pili linalohamasisha mataifa kuingiza baiskeli katika mifumo yao ya usafiri wa umma. Azimio hilo linahimiza uboreshaji wa miundombinu ya barabara ili iwe salama kwa watumiaji wote, na kuendeleza utamaduni wa kupanda baiskeli katika maeneo ya mijini na vijijini.

WHO pia imetoa nyenzo mpya mwaka huu kusaidia nchi na miji kuboresha usalama wa barabarani na kuongeza matumizi ya baiskeli. Nyenzo hizo ni pamoja na miongozo ya sera, vifaa vya afya ya umma na nyaraka za elimu.

Baiskeli kama chombo cha mabadiliko ya kijamii

“Baiskeli siyo tu njia ya usafiri,” amesema msemaji wa WHO akiongeza kuwa “Ni chombo chenye uwezo wa kupunguza ukosefu wa usawa, kukuza elimu, kujumuisha jamii, na kujenga utamaduni wa amani.”

Siku ya Baiskeli Duniani inaendelea kuvutia usaidizi kutoka kwa wanaharakati, viongozi wa miji, na wataalamu wa afya, wanaoamini kuwa baiskeli ni gari la mabadiliko ya kijamii na mazingira duniani kote.