Wanafunzi wawili wafariki, wawili walazwa hospitalini baada ya kudaiwa kutumia “laughing gas” nchini Nigeria

Wanafunzi wawili wanaodhaniwa kusoma katika Chuo cha Gateway ICT Polytechnic kilichopo Saapade, Jimbo la Ogun nchini Nigeria, wamefariki dunia huku wengine wawili wakilazwa hospitalini baada ya kudaiwa kutumia dawa ya kulevya inayoshukiwa kuwa nitrous oxide (laughing gas).

Tukio hilo lilitokea Jumanne, Julai 21, katika eneo la Oke-Ola Phase II, Isara-Remo, na limethibitishwa na Jeshi la Polisi la Jimbo la Ogun.

Kwa mujibu wa mkazi mmoja wa eneo hilo ambaye hakutaka kutajwa jina, wanafunzi wanne walihusika katika matumizi ya gesi hiyo.

“Tulielezwa kuwa walikuwa wakitumia kile walichokiita laughing gas. Baada ya matumizi hayo, wanafunzi wawili walifariki dunia na wengine wawili wakapelekwa hospitalini kwa matibabu,” alisema mkazi huyo.

Msemaji wa Polisi wa Jimbo la Ogun, DSP Oluseyi Babaseyi, amesema polisi wanaendelea na uchunguzi ili kubaini chanzo halisi cha vifo hivyo na mazingira yote ya tukio.

Amesema miili ya waliofariki imehifadhiwa katika chumba cha kuhifadhi maiti kwa ajili ya uchunguzi wa kitabibu (autopsy), huku manusura wawili wakiendelea kupatiwa matibabu hospitalini.

Polisi pia wametoa onyo kwa wananchi, hasa vijana, kujiepusha na matumizi ya dawa za kulevya na kemikali zinazotumiwa kwa njia isiyo sahihi kutokana na hatari kubwa zinazoweza kusababisha madhara makubwa au hata kifo.

Laughing gas ni nini?

Nitrous oxide, maarufu kama laughing gas, ni gesi inayotumika hospitalini kama dawa ya usingizi na kupunguza maumivu wakati wa baadhi ya matibabu. Hata hivyo, inapovutwa kwa lengo la kujiburudisha bila usimamizi wa kitabibu, inaweza kusababisha upungufu wa oksijeni mwilini, kupoteza fahamu, uharibifu wa mfumo wa neva, matatizo ya moyo na kupumua, na katika baadhi ya matukio inaweza kusababisha kifo.

Mamlaka nchini Nigeria zinaendelea na uchunguzi ili kubaini iwapo gesi hiyo ndiyo iliyosababisha vifo hivyo na kuchukua hatua za kisheria endapo itabainika kulikuwa na ukiukwaji wa sheria.