Wanawake kutozwa Sh. 500, kwa ajili ya kununua mzani wa watoto kliniki

Wanawake kutozwa Sh. 500, kwa ajili ya kununua mzani wa watoto kliniki.

WANAWAKE wa Kijiji cha Nyashimbi, Kata ya Puni, wilayani Shinyanga, wamelalamikia kutozwa Sh. 500, kwa ajili ya kununua mzani wa kupimia uzito watoto wanapowapeleka kliniki.

Malalamiko hayo yametolea jana, katika mkutano wa hadhara wa Mbunge wa Jimbo la Itwangi, Azza Hillal Hamad, uliofanyika kwa ajili ya kusikiliza kero za wananchi na kuzitafutia majibu.

Mmoja wa wanawake hao, Eva Mbeshi, mkazi wa Kitongoji cha Kigwang’hona, Kijiji cha Nyashimbi, amesema wamekuwa wakihangaika kupata huduma ya kliniki ya kupima uzito wa watoto, kutokana na mzani kuharibika na kuambiwa wachange Sh. 500 kwa ajili ya kununua mwingine mpya.

“Tuna miezi miwili watoto wetu hawajapimwa uzito hadi tutoe hiyo Sh. 500, ili kununua mzani mwingine mpya,” amesema Eva.

Mganga Mfawidhi wa Zahanati ya Kijiji cha Nyashimbi, Stephano Masinga, amekiri mzani wa kupimia uzito watoto kuwa umeharibika na kwamba alishaandika ombi la kupata mzani mwingine kutoka Bohari ya Dawa (MSD), lakini licha ya kuagiza zaidi ya mara tatu mzani huo hawajaupata.

Amesema, baada ya kuona hawapati mzani huo, kutoka bohari ya dawa, ndipo wakaona ili kuendelea kutoa huduma hiyo, ni vyema wananchi wakachangia sh. 500 ili wanunue mzani mpya na watoto waendelee kupimwa uzito.

Mbunge wa Jimbo hilo la Itwangi, Azza, amesema yeye kama mwakilishi wa wananchi, atanunua mzani huo kwa fedha zake mwenyewe na kuukabidhi ndani ya wiki moja, ili watoto waendelee kupata huduma za kliniki na kupimwa uzito.

“Nimekaa hapa nikajiuliza, jamani, hata hili la mzani wa kupimia watoto mpaka litoke MSD? Mganga wangu naomba hilo andiko la MSD ulifute, mimi kama Mbunge wenu nitaununua huo mzani, nimewasiliana na mtu wa famasi, ameniambia ndani ya wiki moja atakuwa ameuleta,” amesema Azza.

Credits:Nipashe