Afyaclass

Showing posts with label Afya News. Show all posts

Maambukizi Ya Malaria Yapungua Hadi Asilimia 8.1 Kwa Mwaka 2015-2022

Wizara ya afya kupitia mpango wa taifa wa kudhibiti malaria kwa kushirikiana na OR-TAMISEMI imepunguza kiwango cha malaria kwa asilimia 45 kutoka 14.8 ya mwaka 2015 hadi kufikia asilimia 8.1 mwaka 2022.

Hayo yamebainishwa na Naibu waziri wa Afya Dkt. Godwin Mollel kwa niaba ya Waziri wa Afya Mhe. Jenista Mhagama katika kikao cha Kamati ya Kudumu ya Bunge na Masuala ya Ukimwi kilichofanyika katika ukumbi wa bunge Jijini Dodoma.

Dkt. Mollel amesema kuwa, Serikali imetekeleza mikakati ya udhibiti wa mbu waenezao Malaria kwa njia ya utengamano pamoja na ugunduzi, matibabu na tiba kinga dhidi ya malaria ambapo imewezesha mafanikio hayo kwa takribani miaka 8 na kupunguza wagonjwa wa malaria wanaotibiwa kama wagonjwa wa nje (OPD) kwa asilimia 55.

“Serikali imetekeleza afua mbali mbali kwa takriban miaka minane na kufanikiwa kupunguza kiwango cha malaria kwa asilimia 45 kutoka 14.8 hadi 8.1 pamoja na kupunguza wagonjwa wa nje kwa asilimia 55 ambapo awali walikua ni milioni 7.7 hadi 3.5 kwa mwaka 2023”. Amesema Dkt. Mollel

Aidha, Dkt. Mollel amesema kuwa kwa sasa mpango wa taifa wa kudhibiti malaria unatekeleza mpango mkakati wa sita wa mwaka 2021 mpaka 2025 wenye lengo la kupunguza kiwango cha chini kutoka asilimia 7.5 (2017) hadi 3.5 ifikapo 2025

Kwa Upande wake Kaimu Mwenyekiti wa kamati hiyo Mhe. Bi Bernadeta Mushashu ameishauri serikali kuongeza afua za kutokomeza malaria katika mikoa iliyo katika hatari ya maambukiza ya malaria kama vile Tabora unaoongoza kwa asilimia 23.4, Mtwara kwa asilimia 20, Kagera asilimia 18, Shinyanga 16%na Mara 15%.

Aidha ameipongeza Serikali kwa juhudi na malengo ya kuendelea kutekeleza afua za kutokomeza malaria pamoja na kufanikiwa kupunguza mpaka chini ya asilimia katika mikoa ya Arusha, Kilimanjaro, Manyara, Dodoma, Singida, Iringa, Songwe, Dar es Salaam na Mwanza.

Hata hivyo wametoa rai kwa wananchi kuendelea kutekeleza ushauri wa madaktari kuhusu matumizi sahihi ya vyandarua pamoja na kuweka mazingira yanayotuzunguka safi na salama ili kuzuia mazalia ya viluilui ya mbu.

Magonjwa ya Moyo huua ZAIDI ya wagonjwa milioni 20 kila mwaka duniani kote

Daktari bingwa wa magonjwa ya moyo Tanzania na Rais wa Chama cha madaktari bingwa wa magonjwa ya moyo, Robert Mvungi.

ZAIDI ya wagonjwa milioni 20 wanafariki kila mwaka duniani kote kwasababu ya magonjwa ya moyo ambayo kwa asilimia 80 yanatokea kwenye nchi za uchumi wa kati na chini.

Hayo yalisemwa jijini Dar es Salaam na Daktari bingwa wa magonjwa ya moyo Tanzania na Rais wa Chama cha madaktari bingwa wa magonjwa ya moyo, Robert Mvungi, wakati wakisherehekea siku ya moyo Duniani ambayo ufanyika kila Septemba 29 ya kila mwaka na kwa mwaka huu iliandaliwa na Hospitali ya Aga Khan kwa kushirikiana na Taasisi ya Moyo Tanzania. Washiriki walipata punguzo la asilimia 50 kwenye chunguzi za ziada.

Dk. Mvungi alisema takribani makundi yote yanaathirika na matatizo ya moyo kutokana na uzito uliozidi kiwango cha kawaida, shinikizo la damu, kisukari, damu kuwa juu, kuvuta sigara na kutofanya mazoezi.

“Chukua hatua kabla haujapata matatizo ya moyo kwasababu haya matatizo yanachukua rasilimali kubwa kuyatibu kwahiyo watu wanasema kinga ni bora kuliko tiba tujitahidi kufanya mazoezi na kuzingatia lishe bora”

Aidha, alisema chama chao cha madaktari bingwa wa magonjwa ya moyo Tanzania watafungua kampeni ambayo haitaishia mjini pekee itafika vijijini na sehemu zote za nchi ili kutoa elimu kuhusu magonjwa hayo na kuchukua hatua.

“Tunajua serikali yetu inajitahidi kuweka mikakati mbalimbali kuhusu magonjwa ya moyo, lakini bado haijawafikia walengwa wote hapa Tanzania, tunataka tuwafikie walengwa hata vijijini hivyo kupitia siku hii mkakati ni kwamba tuweze kutoa elimu kuwafikia watu waweze kujua matatizo ya moyo, wajikinge na wachukue hatua” alisema.

Akizungumza kwa niaba ya Daktari Bingwa wa Moyo kutoka Hospitali ya Aga Khan, Dk. Julius Msukuya, alisema kati ya asilimia 25 hadi 30 ya wagonjwa ambao wanawapokea katika hospitali ya Aga Khan wanamagonjwa ya moyo yakiwa ni magonjwa mtambuko.

Alisema wagonjwa ambao wanawaona ni zaidi ya asilimia 30 hadi 50 wana shida ya moyo na matibabu yake yameimarika kwa kuzingatia chakula, mazoezi na usaidizi wa dawa kutoka kwa madktari.

“Usipuuzie dalili za magonjwa ya moyo, fanya uamuzi wa haraka dhidi ya ugonjwa wa shambulizi la moyo, katika siku hii ya moyo duniani ni muhimu tuweke afya ya moyo kuwa kipaumbele kwa kujifunza kutambua dalili za awali za shambulio la moyo, hatua za haraka zinaweza kufanya tofauti kubwa katika matokeo ya matibabu na tunaweza kuongeza uelewa na kukuza jamii yenye afya bora ya moyo”

Suluhu ya Janga la Usugu wa vimelea dhidi ya dawa duniani yatafutwa

Usugu wa dawa hutokea pale ambapo vimelea vya magonjwa kama vile bakteria,virusi n.k vinapokuwa vimebadilika katika kipindi fulani na hivyo haviwezi tena kutibika kwa kutumia dawa zilizopo.

Viongozi wa dunia na wataalamu wa afya leo wamekusanyika kwenye Makao Makuu ya Umoja wa Mataifa, New York, Marekani wakitafta suluhu ya janga la usugu wa vimelea dhidi ya dawa, UVIDA au AMR kwa lugha ya kiingereza, na hatimaye kupitisha azimio la kisiasa la kukabiliana na tishio hilo la kiafya linalozidi kukua kila uchao.

Akizungumza na waandishi wahabari wakati wa Mjadala Mkuu wa Baraza Kuu la Umoja wa Mataifa, Mkurugenzi Mkuu wa shirika la Umoja wa Mataifa la Afya duniani, WHO, Dkt. Tedros Adhanom Ghebreyesus, amegusia ukubwa wa suala hilo, akisema UVIDA au AMR husababisha vifo vya zaidi ya watu milioni 1 kila mwaka.

“Azimio hili ni ishara thabiti kutoka kwa nchi kwamba wameazimia kutatua kitisho hiki cha kimataifa,” amesema Dkt. Tedros akiongeza kuwa “leo hii UVIDA ni moja ya vitisho vikubwa zaidi vya afya duniani. UVIDA inaweza kurudisha nyuma kwa miaka 100 maendeleo ya kiafya yaliyopatikana duniani, kwa kufanya maambukizi yanayoweza kutibika haraka, kuwa chanzo kikubwa cha Vifo.”

Lengo la azimio ni kupunguza vifo kwa asilimia 10 ifikapo 2030

Pia amesisitiza kuwa hakuna taifa lililo na kinga dhidi ya kitisho hicho, ijapokuwa nchi za kipato cha chini na kati zinabeba mzigo mkubwa zaidi.

Ameeleza kwamba lengo la azimio hilo ni kupunguza vifo vihusianavyo na UVIDA kwa asilimia 10 ifikapo mwaka 2030.

“Kufikia lengo hilo la kwenye azimio, kunahitaji kuchukua hatua sio kwenye sekta ya afya ya binadamu pekee, bali pia sekta ya afya ya wanyama na mazingira,” ametanabaisha.

Dkt. Tedros amesema kwamba WHO pamoja na mashirika ya Umoja wa Mataifa, lile la Afya na Chakula, FAO, afya ya Wanyama, WOAH, na lile la mazingira, UNEP yanashirikiana chini ya mpango mmoja wa AFYA MOJA ili kutatua suala hilo.

Wengi wetu hatumalizi dozi ya dawa - Mottley

Akizungumza kwenye mkutano huo na waandishi wa habari ni Waziri Mkuu wa Barbados, Mia Mottley ambaye ameelezea UVIDA kama janga linalokua kimya kimya.

Ametaja matumizi holela au matumizi ya kupita kiasi ya dawa za kuua vimelea vya magonjwa kuwa kichochea kikubwa cha usugu.

Mottley amesema wengi wetu tunapata dawa za kuua vimelea vya magonjwa Tunatumia kwa siku chache. Hatumalizi dozi kama tulivyoelekezwa na daktari.

Amesema “lazima tubadili tabia hii katika ngazi ya mtu mmoja mmoja na hilo ndilo lengo la msingi kwanza kabisa, katika mkutano huu wa ngazi ya juu wa viongozi na azimio la kisiasa ili kuanza kuleta mabadiliko.”

“Hebu fikiria unapata maambukizi kwa kwenda bustanini au kujifungua mtoto au unapokwenda kwa daktari wa meno. Vitu hivi vinawea kumaliza maisha yako ndani ya saa 48 au 72 iwapo dawa mahsusi ya kuua vimelea vya magonjwa husika itashindwa kufanya kazi,” amesema Bi.Mottley.

UNEP, WOAH, FAO nao wazungumza

Kwa Inger Andersen, Mkurugenzi Mtendaji wa shirika la Umoja wa Mataifa la Mazingira, UNEP, usugu huo hatari wa vimelea dhidi ya dawa unaweza kusababisha vifo vya watu milioni 40 na watu wengine milioni 160 kufa kwa magonjwa yahusianayo na UVIDA kati yam waka 2025 na 2050 iwapo hatua haitachukuliwa.

Mkurugenzi wa WOAH, Emmanuelle Soubeyran amekaribisha azimio hilo la kisiasa linalotilia mkazo kinga, hasa kwenye afya ya Wanyama na matumizi ya chanjo. Amesema chanjo zinaweza kusadia kuzuia magonjwa ambayo yanaweza kusababisha matumizi ya dawa za kuua vimelea mbali mbali.

Naye Mkurugenzi Mkuu Msaidizi wa FAO, Thanawat Tiensin, ametaka kuweko kwa hatua za pamoja ili kupunguza matumizi ya dawa za kuua vimelea kwenye sekta ya kilimo. “Na tunatarajia kuwa ifikapo mwaka 2030 tutaweza kupunguza matumizi duniani ya dawa za kuua vimelea kwenye mfumo mzima wa mazao ya kilimo na chakula, lakini tunahitaji msaada wenu.”

Madakati bingwa kutoka Tanzania waitwa nchini Zambia kufanya Upasuaji wa moyo

Madakati bingwa wanne wa Taasisi ya Moyo ya Jakaya Kikwete JKCI wako nchini Zambia wakiendelea kufanya upasuaji wa moyo.

Timu hiyo ya madakari hao itashirikiana na wenzao wa Hospitali ya Taifa ya Moyo ya Zambia na watafanyakazi upasuaji wa moyo kwa muda wa wiki moja .

Mkuu wa ujumbe huo, Dk Viviane Mlawi wa (JKCI), ambaye ni daktari bingwa wa moyo kwa watoto, alisema ujumbe huo pia umeambatana na mtaalam mbobezi wa chumba cha upasuaji na mtaalamu wa usingizi katika upasuaji Moyo.

Alisema wameambatana pia na mbobezi katika kuhudumia wagonjwa wa nje wanaokuja kupata matibabu Tanzania, Dk. Maiyer Msengi na wauguzi wawili ambao ni wabobezi wa chumba cha wagonjwa mahututi (ICU).

Dk Mlawi alisema malengo makubwa ya safari hiyo ni matano ambayo ni kufanya upasuaji wa moyo kwa wahitaji ambao ni wengi nchini Zambia na kuwajengea uwezo madaktari wa Zambia mbinu za upasuaji ambazo bado hawajawa nazo na kubadilishana ujuzi.

Alitaja lengo lingine kuwa ni kukagua kwa pamoja na kubainisha maeneo ambayo Tanzania inaweza kushirikia na Zambia katika kuwasaidia wazambia matibabu ya kibingwa kwa wepesi na gharama nafuu.

Dk. Mlawi alisema madaktari hao watakagua na kubainisha vifaa tiba ambavyo vipo na vile ambavyo havipo ili kuweka mikakati ya jinsi gani wanaweza kushirikiana kuvipata ili kuboresha huduma zao.

Alitaja lengo lingine kuwa ni kuona maeneo mbalimbali ya ushirikiano katika tafiti, teknolojia na mambo ya msingi ambayo Tanzania iko mbele sana katika eneo hilo kwa ukanda huu wa Afrika Mashariki na Kati.

Naye Dk. Maiyer ambaye ni mtaalam wa usimamizi wa wagonjwa kutoka nje ya nchi, alisema yapo mambo mengi ambayo JKCI na Hospitali ya Taifa ya Moyo Zambia wanaweza kuyafanya kwa kushirikiana kwaajili ya maendeleo ya nchi hizo mbili.

Alitaja masuala hayo kuwa ni kuhakikisha wanarahisisha utoaji wa vibali vya kuingia kwenye nchi hizo (visa), malazi kwa wanaotembelea nchi hizo na usajili wa mawasiliano ya namba za simu na vibali vya kwenda kupata matibabu.

Alisema kwa upande wa Tanzania watahakikisha kunakuwa na uhakika wa miadi ya kukutana na madaktari bingwa na kupata huduma kwa wakati ili kupunguza gharama za kuishi nchini kwa muda mrefu .

Alisema watahakikisha kunakuwa na huduma bora wakati na baada ya upasuaji wa wagonjwa wa moyo na kufanya JKCI iendelee kuwa kimbilio kwa mataifa mengi ya Afrika na kwingineko.

Alisema jambo lingine la msingi ambalo watahakikisha linazingatiwa ipasavyo ni uhakika wa gharama sahihi za vipimo na matibabu na usalama wa mgonjwa kwa kulinda haki zake zote akiwa anapata matibabu.

Alisema kuna umuhimu wa kuendelea kuboresha uhusiano baina ya mataifa hayo mawili katika utoaji wa taarifa ubalozini hasa kwa kuzingatia kuwa kuna mahitaji makubwa ya watu kuja nchini kupata matibabu ya moyo.

Msemaji wa Hospitali ya Moyo ya Taifa ya Zambia, Dk. Chabwela Shumba alisema wamekutana na madaktari wa Tanzania na baada ya kufanya uchambuzi wa uwekezaji ambao serikali imefanya kwa JKCI wameona kwamba watanufaika kwa kiwango kikubwa kama watashirikiana na Tanzania.

“Tumeshangaa sana kuona uwekezaji mkubwa uliofanywa katika vifaa vya kisasa kama MRI, CT SCAN, rasilimali watu, teknolojia na kiwango kikubwa cha wagonjwa waliofanyiwa upasuaji wa moyo kwa mafanikio makubwa,” alisema Shumba.

Alisema wamebaini kuwa JKCI inateklojia ile ile inayotumiwa na mataifa yaliyoendelea hivyo hakuna haja ya kuwapeleka wagonjwa wao kwenye nchi hizo kwani wanaweza kupata huduma kama hizo taasisi ya JKCI.

Uvimbe wa kilo Tano waondolewa mwilini kwa Mgonjwa

HOSPITALI ya Taifa Muhimbili (MNH), imefafanua saa nne za upasuaji mkubwa aliofanyiwa Karume Ally Kalume, kumuondoa kilo tano za uvimbe mwilini, ambaye tatizo lake limebainika ni la kuzaliwa nalo.

Kadhalika, Kalume ambaye alilazwa hospitalini hapo kwa takribani siku 23, anasubiri kufanyiwa upasuaji wa pili katika hospitali hiyo, sehemu ya mguuni ambako pia kuna uvimbe.

Kalume, mwili wake ulikuwa unaota uvimbe maeneo tofauti ya mwili wake na kumsababishia uzito, alifika hospitalini hapo Agosti 28 na kisha kufanyiwa uchunguzi na upasuaji kufanyika Agosti 30, mwaka huu.

Mkuu wa Kitengo cha Upasuaji Rekebishi Idara ya Upasuaji MNH na Bingwa wa Upasuaji Rekebishi, Dk Laurean Rwanyuma, amesema hayo leo, jijini Dar es Salaam kwamba, Kalume amefanyiwa upasuaji huo kwa kuondolewa uvimbe, baada ya kupokelewa katika wodi ya Kibasila.

"Vipimo vilifanyika vya damu na x-ray ili kubaini ana tatizo gani, matibabu yake yalihitaji kufanyiwa upasuaji kuondoa uvimbe shingoni, begani na kifuani. Agosti 30, mwaka huu aliingia chumba cha upasuaji kufanyiwa upasuaji huo, iliochukua takribani saa nne na wataalamu walioshiriki ni wanne.

Baada ya hapo alipokelewa wodi ya Sewahaji, ambako kipo kitengo cha upasuaji Rekebishi. Ugonjwa huu sio wa kuambukiza ni wa kuzaliwa nao. Mara nyingi mtoto anapozaliwa ni vizuri kuungalia mwili wake, inaweza uvimbe uwe haujatokeza, lakini kuna alama ambazo ukizingalia uwaambie wataalamu wajue ni kitu gani," amesema Dk. Rwanyuma.

Amesema Kalume alianza kupata uvimbe huo akiwa na umri wa miaka 15 na kwamba atahitaji matibabu mengine, kwa sababu ana uvimbe mdogo maeneo tofauti, ikiwamo mguuni.

"Amekuwa na uvimbe mkubwa asingeweza kuondolewa kila kitu, kwa sababu upasuaji ulikuwa ni mkubwa. Atahudhuria kliniki kila baada ya wiki mbili, tutapanga upasuaji mwingine kumalizia uvimbe. Hatuondi kila kitu, ila mkubwa tumeuondoa,"

Kalume mwenye umri wa miaka 41, ni mkazi wa Mbagala Kilungule, mtaa wa Mwinyi, wilaya ya Temeke, Dar es Salaam, ameishi na tatizo hilo kwa takribani miongo miwili.

Ugonjwa wa kipindupindu waua 300 Sudan

Idadi ya vifo vinavyotokana na mlipuko wa kipindupindu nchini Sudan imeongezeka hadi kufikia 348, hiyo ni kulingana na Wizara ya Afya.

Mlipuko huo umeathiri majimbo tisa, na zaidi ya wagonjwa 11,000 wameripotiwa. Wakati huo huo, kuna wasiwasi wa uwezekano wa kuzuka kwa homa ya dengue, baada ya vifo viwili vinavyoshukiwa.

Mvua kubwa na mafuriko yamezidisha kuenea kwa ugonjwa wa kipindupindu tangu Juni.

Kudorora kwa mfumo wa huduma ya afya nchini Sudan kumefanya juhudi za kudhibiti magonjwa ya kuambukiza kuwa ngumu zaidi.

Nchi hiyo ya kaskazini-mashariki mwa Afrika imekumbwa na vita tangu Aprili 2023 kati ya jeshi la Sudan chini ya mtawala mkuu wa nchi hiyo Abdel Fattah al-Burhan na Kikosi cha Msaada wa Haraka (RSF), kinachoongozwa na makamu wake wa zamani Mohamed Hamdan Daglo.

Mgogoro huo umeibua mojawapo ya majanga makubwa zaidi ya kibinadamu duniani, huku zaidi ya watu milioni 25 -zaidi ya nusu ya idadi ya raia wa Sudan – wakikabiliwa na njaa kali.

FAHAMU ZAIDI UGONJWA HUU,NDANI YA AFYACLASS;

Ugonjwa wa Kipindupindu husababishwa na nini? dalili,Madhara na Matibabu yake

Ugonjwa wa kipindupindu(Cholera) ni ugonjwa unaosababisha watu kuharisha, na ugonjwa huu huweza kusababisha kifo ndani ya masaa machache kama mtu hajapata Tiba.

Kwa Mujibu wa Takwimu za Shirika la Afya Duniani(WHO);

Watafiti wamekadiria kuwa kila mwaka kuna visa milioni 1.3 hadi 4.0 vya kipindupindu, na vifo 21,000 hadi 143,000 duniani kote kutokana na kipindupindu

“Researchers have estimated that each year there are 1.3 to 4.0 million cases of cholera, and 21 000 to 143 000 deaths worldwide due to cholera (1)”.

Ugonjwa wa kipindupindu ni Mojawapo kati ya magonjwa yanayohusishwa na umaskini na uchafu wa kupindukia. Inaripotiwa kuwa Kipingupindu ni miongoni mwa magonjwa ambayo huathiri jamii maskini zaidi kwa kiasi kikubwa hasa hasa kwenye nchi zinazoendelea, kiasi kwamba Shirika la Afya Duniani (WHO) limeuweka ugonjwa huu kama mojawapo ya viashiria vya maendeleo ya jamii husika. Nchini Tanzania hususani katika jiji la kibiashara la Dar es Salaam, haishangazi basi kusikia kila mwaka kuna mlipuko wa ugonjwa huu pamoja na juhudi kubwa za serikali na mamlaka zake kujitahidi kuhimiza wananchi kupambana na ugonjwa huu.

Kwanini nchi zinazoendelea?

Moja wapo ya changamoto zinazokabili nchi zinazoendelea ni jamii kutokuwa na uhakika wa kupata Maji safi na salama, pamoja na kutokuwa na mazingira safi kwa ujumla. Ndio maana mpaka leo nchi zinazoendelea ndizo zinazokumbwa na mlipuko wa kipundupindu au huwa katika hatari ya mlipuko wa ugonjwa huo.

Kipindupindu husababishwa na nini?

Ugonjwa huu hutokana na maambukizi katika utumbo mdogo wa binadamu uletwao na vimelea vya bacteria vijulikanavyo kitaalamu kama Vibrio cholerae.

Jinsi unavyoweza kuambukizwa

Kwa kawaida vimelea hawa hupendelea kuishi katika kinyesi cha binadamu. Mtu anaweza kuambukizwa ugonjwa huu kwa kunywa maji ama chakula kilichochafuliwa na kinyesi chenye vimelea hivi vya kipindupindu.

Mara baada kula chakula au kunywa maji yaliyochafuliwa, baadhi ya vimelea hivi huuwawa kwa tindikali iliyopo kwenye tumbo (stomach) pindi chakula au maji haya yanapoingia tumboni. Hata hivyo baadhi ya vimelea hawa hufanikiwa kukwepa ukali wa hii tindikali na hivyo kuendelea kuishi. Vimelea waliofanikiwa kuepukali tindikali ya tumbo la binadamu, hujongea kwenda kwenye ukuta wa utumbo mdogo kwa kutumia ‘maumbo’ maalum yaliyo kwenye miili ya ambayo huwawezesha kusafiri ama kwa kitaalamu hitwa flagella. Wawapo kwenye ukuta wa utumbo mdogo Vibrio cholerae hutoa sumu iitwayo CTX au CT (cholera Toxin) ambayo husababisha mtu kuharisha choo chenye majimaji, papo hapo kuendelea kutoa kizazi kingine cha vimelea hao nje kwa njia ya haja kubwa. Iwapo choo hicho cha mtu aliyeambukizwa kipindupindu kitachanganyika na chanzo cha maji au chakula, watu wengine huambikzwa kirahisi. Hali kadhalika iwapo ni kwenye choo ambacho hakipo kwenye mazingira ya usafi kuna hatari ya choo cha mwambukizwa kuchanganyika na chanzo cha maji au chakula na hivyo kupelekea watu wengi zaidi kuambukizwa ugonjwa huu.

Dalili za kipindupindu ni zipi?

Dalili za mwanzo kabisa za kipindupindu ni
• Kuanza Kuharisha ghafla choo chenye majimaji (ambacho rangi yake ni kama maji ya mchele) na chenye harufu mbaya kama shombo ya samaki.
• Kutapika

Aidha mgonjwa wa kipindupindu huonesha dalili zakupungukiwa maji mwilini kama vile
• ngozi huwa kavu,
• midomo kukauka,
• mgonjwa kuhisi kiu kikali,
• machozi kutoweza kutoka,
• kupata mkojo kidogo sana,
• Kuishiwa nguvu na kujisikia mchovu sana.
• Macho kutumbukia ndani hasa kwa watoto.

SOMA Zaidi hapa;

Dalili za Ugonjwa wa kipindupindu

Kipindupindu ni ugonjwa wa kuhara unaosababishwa na maambukizi ya bakteria wa Vibrio cholerae kwenye Utumbo.

Watu wanaweza kuugua kipindupindu wanapokula chakula au maji yaliyochafuliwa na bakteria wa kipindupindu. Maambukizi mara nyingi huwa hafifu au hayana dalili, lakini wakati mwingine yanaweza kuwa makali na ya kutishia maisha;

DALILI ZA UGONJWA WA KIPINDUPINDU

Kipindupindu – Maambukizi ya Vibrio cholerae

Daktari akimchunguza mgonjwa ataona dalili zote za upungufu wa maji mwilini

Takriban mtu 1 kati ya 10 aliye na kipindupindu atapata dalili kali, ambazo, katika hatua za mwanzo, ni pamoja na:

– kuhara kwa maji mengi, wakati mwingine hufafanuliwa kama “kinyesi cha maji ya mchele”

– Mgonjwa kutapika sana

– Mgonjwa kupata kiu sana

– Kupata maumivu ya miguu

– kutotulia au kuwashwa n.k

Wahudumu wa afya wanapaswa kuangalia dalili za upungufu wa maji mwilini wanapomchunguza mgonjwa aliye na kuhara kwa maji mengi. Hizi ni pamoja na:

– moyo kwenda mbio

– Ngozi ya mwili kuwa kavu sana na kupoteza elasticity ya ngozi

– utando wa mucous kavu

– shinikizo la chini la damu

Watu walio na kipindupindu kikali wanaweza kupata upungufu mkubwa wa maji mwilini, ambayo inaweza kusababisha kushindwa kwa figo. Ukikosa kutibiwa, upungufu mkubwa wa maji mwilini unaweza kusababisha mshtuko, kukosa fahamu na kifo ndani ya saa chache.

Shida hii ya kuharisha kutokana na Ugonjwa wa kipindupindu huambatana na kiasi kikubwa cha vijidudu vya kuambukiza vya Vibrio cholerae vinavyoweza kuwaambukiza watu wengine wakivimeza. Hii inaweza kutokea wakati bakteria huingia kwenye chakula au ndani ya maji.

Ili kuzuia bakteria kuenea, kinyesi (takataka za binadamu) kutoka kwa watu walio wagonjwa kinapaswa kutupwa kwa uangalifu ili kuhakikisha kuwa hakiambukizi chochote kilicho karibu.

Watu wanaowahudumia wagonjwa wa kipindupindu lazima wanawe mikono kabisa baada ya kugusa kitu chochote ambacho kinaweza kuwa na kinyesi cha wagonjwa (kinyesi).

Wagonjwa wa kipindupindu wanapotibiwa haraka, kwa kawaida hupona bila matokeo ya muda mrefu. Wagonjwa wa kipindupindu kwa kawaida hawawi wabebaji wa bakteria ya kipindupindu baada ya kupona, lakini huwa wagonjwa ikiwa wataambukizwa tena.

Vipimo vya utambuzi wa Kipindupindu

Kwa kawaida kipindupindu huweza kugunduliwa na kutambuliwa kwa kutumia dalili. Hata hivyo ili kuthibitisha kuwa mlipuko uliotokea ni kweli kipindupindu, vipimo vifuatavyo huweza kufanyika

Kupima damu kwa ajili ya kuotesha vimelea vya kipindupindu maabara.

Kuchunguza choo kwa kutumia darubini (dark field microscope) ambapo vimelea hivi vya V. cholerae huweza kuonekana. Vile vile choo hiki hutumika kuotesha vimelea vya v. cholerae kwa ajili ya utambuzi zaidi.

Tiba ya Kipindupindu

Lengo kuu katika kutibu kipindupindu ni kurejesha maji na madini ambayo mgonjwa wa kipindupindu hupoteza kwa wingi baada ya kuharisha na kutapika.

Njia kuu zitumikazo katika kumrejeshea mgonjwa wa kipindupindu maji na madini aliyopoteza ni kwa kumpatia maji maalum yenye madini hayo kwa njia ya mdomo, yaani kwa kumpa anywe au kwa njia ya mshipa wa damu ambayo kitaalamu huitwa intravenously (i.v)

ORS

Pamoja na ORS hiyo ambayo imetengenezwa na kuwekwa kwenye paketi tayari kwa matumizi, Shirika la afya duniani (WHO) limetoa pia mwongozo wa kutengeneza maji yenye madini yanayohitajika mwilini (oral rehydration fluid) ambao ni rahisi na usio na gharama.

ORS ya kutengeneza nyumbani kwa kadiri ya muongozo huo huitaji kuchanganya na
• Lita moja ya maji safi na salama,
• Changanya na vijiko vidogo vinane vya sukari, kisha
• Ongeza na kijiko kidogo kimoja cha chumvi
• Aidha, unaweza kuongeza nusu glasi ya juice ya machungwa au nusu ya ndizi (tunda) lilipondwapondwa kwa kila lita, ili kuongeza madini ya potassium na pia kuboresha ladha.

Kwa wagonjwa wenye hali mbaya na wale waioweza kunywa wenyewe, hupewa maji yenye madini mbambali kwa njia ya mshipa wa damu. Maji haya huitwa kitaalamu kama Ringer’s Lactate.

Mwongozo wa kufuata katika kutibu kipindupindu

Baada wa mgonjwa kuwasili katika kituo cha afya, hupimwa kiwango cha upungufu wa maji kilichopo mwilini.

Kisha muhudumu wa afya husahihisha upungufu wowote wa maji utakaonekana kwa awamu mbili. Kwanza kwa kati ya masaa 4-6 ya kwanza tangu kuwasili kituoni na kuendelea mpaka hali ya kuishiwa kwa maji mwilini itakapoonekana imekwisha.

Mhudumu wa afya hutakiwa kurekodi kwenye chati maalum kiasi cha maji anayokunywa mgonjwa na kiasi cha mojo anachokojoa.

Njia ya mshipa hutumika pale tu, hali ya mgonjwa inapokuwa mbaya sana au pale ambapo mgonjwa hawezi kunywa chochote mwenyewe. Aidha kiasi cha maji kitolewacho kwa njia hii ya mshipa wa damu hwa ni kati ya 50-100 mL kwa kilo za uzito wa mgonjwa kwa saa.

Baada ya hapo, mgonjwa huendelea kupewa ORS anywe kwa kiwango cha 800 mpaka lita moja kwa saa

Matumizi ya dawa katika kutibu kipindupindu

Ieleweke kuwa tiba sahihi na makini ya ugonjwa huu wa kipindupindu ni kumrejeshea mgonjwa maji na madini aliyopoteza wakati wa kuharisha na kutapika kwa njia ambazo zimeelezwa hapo juu. Matumizi ya dawa (antibayotiki) husaidia tu kufupisha muda wa kuwatoa wadudu na wala yasitumike kama tiba kuu ya ugonjwa huu.

Baadhi ya dawa ambazo hutumika katika matibabu ya ugonjwa huu ni Azithromycin naTetracycline.

Jinsi ya kuzuia kipindupindu

Mara kwa mara serikali na taasisi zake zimekuwa zikihimiza watu jinsi ya kujikinga na ugonjwa huu wa kupindupindu. Miongoni mwa njia zinazofaa katika kuzuia milipuko ya ugonjwa huu ni

Upatikanaji wa maji safi na salama, watu hawana budi kuhakikisha kuwa maji ya kunywa yanachemshwa vyema kabla ya kuyanywa. Vile vile wanaweza kutumia chlorine katika maji ambayo huua vimelea hawa wa V. cholerae.

Ni muhimu kunawa mikono baada ya kutoka chooni na kabla ya kula

Tunashauriwa kufunika chakula kikiwa mezani ili nzi wasitue juu yake

Inashauriwa kujenga choo umbali wa angalau mita 30 kutoka chanzo cha maji

Inashauriwa kwa wasafiri watokao nchi zilizoendelea kupata chanjo iitwayo Dukoral, pindi wanaposafiri kwenda nchi zinazoendelea.

KWA USHAURI ZAIDI,ELIMU AU TIBA JUU YA TATIZO LOLOTE TUWASILIANE KWA NAMBA +255758286584.

Kuna zaidi ya magonjwa 200 yanayohusishwa na wanyama kuhamia kwa binadamu

Wataalamu wa mifugo wakiwa katika ufunguzi wa mafunzo ya miezi minne yaliyoratibiwa na Shirika la Umoja wa Mataifa la Chakula na Kilimo (FAO) kwa ufadhili wa Shirika la Misaada la Marekani (USAID), yenye lengo la kuwezesha wataalamu wa mifugo kubaini, kuzuia na kurekodi magonjwa ya wanyama yaambukizwayo kwa binadamu, Jijini Dar es Salaam.

Katibu Mkuu, Wizara ya Mifugo na Uvuvi, Profesa Riziki Shemdoe amewataka wataalamu wa mifugo nchini kuwa mstari wa mbele kuzuia usambazaji wa magonjwa ya mifugo kushambulia binadamu ili kuisaidia Serikali kutotumia fedha nyingi kutibu magonjwa yanayozuilika.

Amesema kuzuia magonjwa ya wanyama kwenda kwa binadamu ni rahisi kuliko matibabu ambayo huhitaji fedha na muda mwingi.

Profesa Shemdoe ameyasema hayo leo Septemba 19,2024 jijini Dar es Salaam wakati akifunga mafunzo ya miezi minne yaliyoratibiwa na Shirika la Umoja wa Mataifa la Chakula na Kilimo (FAO) kwa ufadhili wa Shirika la Misaada la Marekani (USAID) yakilenga kuwezesha wataalamu wa mifugo kubaini, kuzuia na kurekodi magonjwa ya wanyama yaambukizwayo kwa binadamu.

"Mafunzo haya ni muhimu sana kwa wataalamu wa mifugo, kutibu magonjwa ya mifugo kwa binadamu tunatumia fedha nyingi kuliko kuyaangalia magonjwa haya mapema.

“Ni muhimu kuwa mstari wa mbele kuzuia magonjwa haya kwenda kwa binadamu kufanya hivyo tutakuwa tumesaidia kuokoa fedha nyingi za Serikali ambazo zingetumika kwenye matibabu," amesema.

Hoja hiyo inafafanuliwa na Mratibu wa Mafunzo ya Epidemiolojia na Usimamizi wa Maabara wa Wizara ya Afya Dk Rogath Kishimba akisema, chanjo ya mifugo gharama yake ni ndogo lakini ugonjwa ukihamia kwa binadamu kutoka kwa mnyama gharama ya matibabu ni kubwa.

Akitolea mfano wa kichaa cha mbwa, Dk Kishimba amesema chanjo hiyo huchanjwa mbwa kwa Sh2,000 lakini mtu anapong'atwa na mbwa mwenye ugonjwa huo hulazimika kupata chanjo nne ambazo hutolewa kwa Sh30,000 hadi Sh60,000 kwa dozi moja.

Profesa Mdoe amewataka wataalamu hao kutumia mafunzo waliyopata kuchanja mifugo ili Tanzania iendelee kukuza soko la nyama kimataifa, kwani tayari kuna nchi inaangalia uwezekano wa kuagiza tani 54,000 za nyama kutoka nchini.

Kwa upande wake Dk Kishimba amesema mtu anapopatwa na kichaa cha mbwa na kuanza kuonyesha dalili, uwezekano wa kupona kwake ni mdogo.

"Ukiwa na wagonjwa 100 ni wastani wa wagonjwa wawili pekee ndio wanaweza kupona au wote wasipone kabisa, ndio maana tunasisitiza muhimu kuadhibiti, yakiwa kwa wanyama ni nafuu kutibu na kuzuia," amesema.

Naye, Mkurugenzi wa huduma za mifugo kutoka Wizara ya Mifugo na Uvuvi, Dk Benezeth Lutege amesema katika kuongeza upatikanaji bora wa chanjo, Serikali imeondoa kodi ya chanjo za mifugo zinazoingizwa kutoka nje ya nchi.

"Chanjo na dawa za mifugo nchini zinaingizwa bila kodi, kwahiyo gharama za chanjo tunategemea zitakuwa ndogo. Pia, tuna chanjo ya mbwa tunatarajia kuzalisha na ipo katika hatua mbalimbali za uzalishaji na huenda hadi 2030 tutakuwa tumeanza kuzalisha, pia tumeandaa mkakati wa kutokomeza kichaa cha mbwa 2024 hadi 2028 na tumeshawasilisha Shirika la Nyama Duniani," amesema.

Mkakati huo utakapopitishwa utaipa Tanzania nafasi ya kuanza kupokea chanjo ya kichaa cha mbwa kutoka kwenye shirika hilo.

Kwa hali ilivyo, mtaalamu wa mifugo kutoka Masasi Innocent Mrope amesema katika watu 300 walio na umri wa miaka 18 na kuendelea waliowafanyia utafiti katika vijiji 15 wilayani hapo, asilimia 54.6 hawana uelewa kuhusu kichaa cha mbwa na asilimia 32.3 walikuwa na mtazamo hasi kuhusu tatizo hilo.

Amesema ni muhimu wilaya hiyo ikajikita kutoa elimu kwa wananchi kuhusu kichaa cha mbwa kwani asilimia 14 pekee ndio wenye mtazamo chanya kuhusu ugonjwa huo, wengi wao wanapopata tatizo linalohusisna na ugonjwa huo hawaamini kupona kupitia matibabu au kuchanja mbwa wao.

Akizungumzia wahitimu wa mafunzo hayo, Mratibu wa Programu FAO Mosses Ole Neselle amesema wataalamu wa mifugo waliowezeshwa mafunzo hayo ni 30 kutoka Tanzania bara 20 na Zanzibar 10.

Amesema mafunzo hayo ni muhimu kwasababu magonjwa ya wanyama yanahatarisha usalama wa chakula duniani na kuzorotesha uchumi wa nchi.

Wataalamu waliojengewa uwezo wanaweza kukusanya taarifa, kufanya utafiti wa magonjwa ya mlipuko na kubaini viashiria vya magonjwa.

Takwimu zilivyo

Kwa mujibu wa Taasisi ya Magonjwa ya Wanyama Duniani asilimia zaidi ya 70 ya magonjwa yanayotokea duniani ni kutoka kwa wanyama kwenda kwa binadamu.

Magonjwa yanayoambukizwa binadamu yatokayo kwa wanyama ni mafua ya ndege, kichaa cha mbwa, marburg ugonjwa wa Ebola na MPox.

Kuna zaidi ya magonjwa 200 yanayohusishwa na wanyama kuhamia kwa binadamu, hii ikiwa na maana kwamba magonjwa 6 kati ya 10 ya kuambukiza ambayo huathiri watu husambazwa na wanyama, ikiwa ni pamoja na wanyama wafugwao nyumbani hiyo ni kwa mujibu wa Kituo cha Marekani cha Kudhibiti na Kuzuia Magonjwa (CDC).

Tovuti ya National Library of Medicine ya nchini Marekani inaonyesha magonjwa yahamayo kwa wanyama kwenda kwa binadamu, yameripotiwa matukio bilioni 2.5 vifo milioni 2.7 vikishuhudiwa.

Via,Mwananchi.

TUHAMASISHANE KWENDA HOPITALI KWA WENYE DALILI ZA TRAKOMA

Na WAF - Dar Es Salaam

Waziri wa Afya Mhe. Jenista Mhagama ametoa rai kwa Watanzania hasa wa Mkoa wa Pwani kushirikiana na Serikali kumhamasisha mwananchi yeyote mwenye dalili za ugonjwa wa Macho kwenda Hospitali kwakuwa ugonjwa huo husababisha upofu.

Waziri Mhagama amesema hayo leo Septemba 18, 2024 wakati wakiwa katika ziara pamoja na Princess Sophie (Duchess of Edinburgh) ambae ni Mke wa Mtoto wa Mfalme wa Uingereza walipotembelea Kituo Cha Afya cha Mlandizi Mkoa wa Pwani kwa lengo la kujionea utoaji huduma za matibabu ya macho

“Yapo magonjwa ambayo hayajapewa kipaumbele sio Tanzania tu bali Duniani kote ikiwemo ugonjwa huu wa macho ( Trakoma) lakini pia magonjwa kama mabusha , matende, minyoo ya tumbo, kichocho.” Amesema Waziri Mhagama

Waziri Mhagama amshukuru Rais wa Jamhuri ya Muungano wa Tanzania Dkt. Samia Suluhu Hassan pamoja na Serikali ya Uingereza kwa kuamua kufanya kazi ya kutokomeza magonjwa haya amabyo hayapewi kipaumbele.

Kwa upande wake, Princess Sophie (Duchess of Edinburgh) ambae ni Mke wa Mtoto wa Mfalme wa Uingereza amesema lengo lao ni kuhakikisha Tanzania inatokomeza magonjwa yasiyopewa Kipaumbele.

“Haya yote yanawezekana kupitia ushirikiano ambao tunautoa kwa Tanzania ikiwa ni kwa mtu mmoja mmoja katika kutokomeza magonjwa ya Trakoma.” Amesema Bi. Sophie

Amesema, Kwa ushirikiano wa Serikali ya Tanzania na Serikali ya Uingereza, kwa pamoja wanaweza kutokomeza ugonjwa huo wa Trakoma kutokana na uzoefu wa magonjwa mengine waliyoweza kuyatokomeza.

Ziara hiyo imemalizika kwa kumtembelea nyumbani kwake mnufaika wa matibabu ya Ugonjwa wa Trakoma yanayotolewa na Serikali kupitia Wizara ya Afya kwa kushirikiana na Wadau akiwemo Sightsavers.

VIKOPE

• • • • •

UGONJWA WA VIKOPE(TRAKOMA),CHANZO,DALILI NA MATIBABU YAKE

Ugonjwa wa Vikope ambapo kwa kitaalam hujulikana kama TRAKOMA,ni ugonjwa ambao hutokea kwenye Kope za macho na kusababisha kope kujikunja kwa ndani hivo kuleta msuguano kati ya kope na kiyoo cha mbele cha jicho.

CHANZO CHA UGONJWA WA VIKOPE(TRAKOMA)

Ugonjwa wa Vikope au Trakoma husababishwa na Bacteria Jamii ya Klamidia Trakomati. Ambapo baada ya mgonjwa kushambuliwa na bacteria hawa matokeo yake ni kujikunja kwa kope kwa ndani nahivo kuleta hali ya msuguano mkubwa ndani ya jicho.

Madhara ya Ugonjwa wa trakoma

MADHARA YAKE;

- Mgonjwa kupata maumivu makali ndani ya jicho kwa sababu ya msuguano

- Jicho kubalika rangi na kuwa jekundu

- Mgonjwa kupata tatizo la uharibifu wa sehemu ya nje ya jicho yaani KONEA

- Lakini pia Mgonjwa anaweza kuwa Kipofu kabsa.

DALILI ZA UGONJWA WA VIKOPE(TRAKOMA)

• Mgonjwa kuwashwa na jicho lilioathirika

• Jicho kutoa machozi lenyewe

• Jicho kutoka uchafu kama matongotongo

• Rangi ya jicho kubalika na kuwa nyekundu

• Mgonjwa kupata maumivu makali ya jicho

• Kuwa na hali ya Msuguano ndani ya jicho

• Kope kuvimba na kujikunja kwa ndani,hivo sehemu ya ndani kuonekana kwa Nje.

MATIBABU YA UGONJWA WA VIKOPE(TRAKOMA)

Matibabu ya Ugonjwa wa Trakoma au Vikope ni pamoja na Matumizi ya Dawa kama Azthromycin na Tetracycline. Lakini ni vizur kwenda hospital kuchunguzwa kwanza kabla ya kutumia Dawa yoyote.

KWA USHAURI ZAIDI,ELIMU AU TIBA TUWASILIANE KWA NAMBA +255758286584.

UTATA umeibuka kuhusu kifo cha Mganga Mfawidhi wa Kituo cha Afya Ulyankulu, Kaliua mkoani Tabora, Dk. Disma Chami, aliyetoweka siku 11 zilizopita baada ya mwili wake kukutwa porini.

Mwili wa daktari huyo umekutwa katika pori huko Kaliua, huku pembeni kukiwa na dawa mbalimbali za hospitalini.

Taarifa zilizosambaa mitandaoni mapema jana, zilieleza kuwa Dk. Chami aliondoka nyumbani kwake Septemba 4, mwaka huu, akimuaga mke wake kuwa angerejea kesho yake.

Hata hivyo, hakurejea na alipotafutwa kupitia simu yake hakupatikana na ilipofika Jumatano ya wiki hii (Septemba 11) ilipatikana lakini kila alipopigiwa hakupokea.

Taarifa hizo zinaeleza kuwa baada ya kutokupokea simu muda mrefu, inadaiwa kuwa alituma ujumbe mfupi kwa mke wake uliosomeka hivi, “Nisamehe sana, baada ya dakika chache sitakuwa nanyi duniani, simamia kila kitu nilichokiacha pesa zote zipo CRDB bank, simamia watoto wasome kwaheri.”

Inaelezwa kuwa baada ya ujumbe huo, simu yake haikupatikana tena na Jeshi la Polisi lilimtafuta bila mafanikio na ndipo jana mwili wake uliokotwa maeneo ya Malolo ukiwa umechomwa sindano.

Taarifa hizo zinaeleza kuwa pembeni mwa mwili huo kumekutwa na dawa mbalimbali za hospitalini ambazo zinadaiwa kutumika kujidunga au kudungwa.

Kamanda wa Polisi Mkoa wa Tabora, Richard Abwao, alipotafutwa na Nipashe ili kuzungumzia tukio hilo simu zake ziliita bila kupokewa.

Mwenyekiti wa Kamati ya Ulinzi Mkoa ambaye pia ni Mkuu wa Mkoa wa Tabora, Paul Chacha, alithibitisha kutokea kwa tukio hilo na kueleza kuwa mganga huyo hakuuliwa, bali alijiua mwenyewe kwa mujibu wa taarifa za uchunguzi kutoka Jeshi la Polisi.

“Yeye mwenyewe aliacha ujumbe akimtaka mke wake kulinda na kusimamia familia, hivyo tukio hilo halihusiani na kuuliwa.

“Hivyo utaratibu wa vipimo bado unaendelea, lakini ujumbe huo wamemkuta nao mke wake na kuthibitisha hilo.

“Jeshi la Polisi litakuja na taarifa rasmi kuhusu ni nani? Amekutwa wapi? Na vipimo vya kitabibu vinasema nini? Kuhusu kilichomkuta yote hayo yakiwa tayari umma utajulishwa baada ya madaktari kufanya postmortem (uchunguzi wa maiti).

Kuhusu madai ya kuwapo kwa mgogoro wa kifamilia kupitia taarifa za familia yake, Chacha alisema kuwa hakuna mgogoro wowote, kwani ujumbe ulioachwa haukuonesha.

Mkuu wa Mkoa huyo alisisitiza kwamba suala hilo linaendelea kuchunguzwa na hadi kufikia leo (Jumapili) majibu yatakuwa yamepatikana.

“Ieleweke kuwa hii ni taarifa ya mwanzo, kwani polisi na madaktari bado wanaendelea na uchunguzi, hivyo kama kutakuwa na taarifa kamili tutazitoa na kuueleza umma, ili kuondoa taarifa za upotoshaji zinazoendelea,” alisema Chacha.