Boti yaua watu 94 waliokuwa wakikimbia mlipuko wa ugonjwa wa kipindupindu

Takriban watu 94 wamefariki, 26 hawajulikani waliko nchini Msumbiji baada ya boti isiyokuwa na leseni kupinduka.

Takriban watu 94 wamefariki wakiwemo watoto na wengine 26 hawajulikani walipo baada ya boti ya feri kupinduka katika pwani ya kaskazini mwa Msumbiji.

Boti hiyo ilikuwa imebeba watu waliokuwa wakikimbia mlipuko wa ugonjwa wa kipindupindu unaolikumba taifa hilo la Afrika Mashariki, shirika la utangazaji la serikali TVM liliripoti.

Meli hiyo ilikuwa mashua ya wavuvi iliyojaa kupita kiasi na haikuwa na leseni ya kusafirisha watu, Lourenco Machado, msimamizi wa INSTRASMAR, alisema kwenye Television ya serikali Jumatatu.

“Siku ya Jumapili tulisajili tukio la baharini ambapo takriban watu 94 walikufa wakati mashua iliyokuwa imebeba watu 130 ilipopinduka. Tumepata miili 94 na 26 haipo,” alisema.

Boti hiyo ilikuwa ikisafirisha watu kutoka Lunga katika jimbo la Nampula kwenda Kisiwa cha Msumbiji, alisema, akiongeza kuwa ripoti za awali zilionyesha kuwa ilikumbwa na wimbi kubwa la maji.

Abiria walikuwa wakikimbia mlipuko wa kipindupindu, Lilisema shirika la utangazaji la TVM, likimnukuu msimamizi mwingine wa baharini wa eneo hilo.

Jaime Neto, waziri wa mambo ya nje wa jimbo la Nampula, pia alisema kuwa abiria hao walikuwa wakikimbia kipindupindu.

“Kwa sababu boti hiyo ilikuwa imejaa watu wengi na haikufaa kubeba abiria, iliishia kuzama,” akiongeza kuwa watoto wengi walikuwa miongoni mwa waliofariki.

Credits; TVM

Photos: TVM,LIB, BBC

Editor; @afyaclass

Reviewed by: Dr.Ombeni Mkumbwa

WHO yatahadharisha juu ya uhaba wa chanjo ya kipindupindu

Shirika la afya duniani WHO limetahadharisha kuwa hatua za haraka zinahitajika ili kukabiliana na ongezeko la ugonjwa wa kipindupindu.

Muuguzi akitoa chanjo ya kipindupindu wakati wa kampeni ya kutoa chanjo katika hospitali ya Kuwadzana mjini HararePicha:

Tahadhari hiyo imetolewa katika wakati ambapo dunia inakabiliwa na uhaba wa chanjo dhidi ya ugonjwa huo wa kuharisha.

Shirika la kimataifa la kuratibu usambazaji wa chanjo ICG, limesema mamilioni ya watu wanakabiliwa na hatari ya kupata kipindupindu kwa sababu kampuni pekee inayozalisha chanjo dhidi ya ugonjwa huo, EuBiologics ya Korea Kusini, imelemewa na mahitaji.

Kupitia taarifa, shirika hilo limeeleza kuwepo kwa ongezeko la wagonjwa wa kipindupindu duniani kote.

ICG imeongeza kuwa, uzalishaji wa chanjo duniani mwaka huu utakuwa kati ya dozi milioni 17 na milioni 50 japo idadi hiyo huenda ikawa ndogo ukilinganisha na mahitaji ya wagonjwa.

Wagonjwa wa kipindupindu waongezeka

Mnamo mwaka 2022, idadi ya wagonjwa wa kipindupindu waliorodeshwa na WHO iliongezeka mara mbili kutoka mwaka 2021 hadi wagonjwa 473,000 ilhali mwaka huu, idadi hiyo imeongezeka na kufikia wagonjwa 700,000.

Ugonjwa wa kipindupindu husababisha mtu kuhara au hata kutapika na kusababisha upungufu wa maji mwilini na wakati mwengine hata kifo, iwapo mgonjwa hatatibiwa haraka.

Kipindupindu husababishwa na vimelea vya bacteria vinavyoitwa kwa lugha ya kitaalamu “Vibrio cholerae”.

Nchi zilizoathirika zaidi na ugonjwa huo ni Jamhuri ya Kidemokrasia ya Kongo, Ethiopia, Haiti, Somalia, Sudan, Syria, Zambia na Zimbabwe.

>>Soma Zaidi hapa Ugonjwa wa kipindupindu na dalili zake