Watoto wengi zaidi kufa kwa Utapiamlo na ukimbizi Sudan kuliko hata vita yenyewe: UNICEF

Vita nchini Sudan ikitimu siku 300 hii leo, shirika la Umoja wa Mataifa la kuhudumia watoto, UNICEF linasema bila rasilimali za kutosha, na njia za kusambaza misaada ya kiutu kuwa wazi, watoto wengi zaidi watakufa nchini humo kutokana na utapiamlo na magonjwa kuliko hata  kutokana na vita yenyewe.

Shirika hilo kupitia taarifa yake iliyotolewa leo huko Port Sudan nchini Sudan linasema kwa sasa utapiamlo umesambaa nchini humo, ukimbizi wa ndani ni mkubwa kuliko eneo lolote duniani na mfumo wa afya umesambaratika na hivyo vigezo hivyo kutishia kuwa sababu ya vifo miongoni mwa watoto kuliko vita yenyewe.

UNICEF inasema inaona viwango vya juu vya matibabu dhidi ya unyafuzi au utapiamlo uliokithiri kwenye maeneo yanayoweza kufikiwa na misaada ya kiutu, na kwamba kwenye maeneo yasiyofikika kutokana na mazingira ya mapigano hali inaweza kuwa mbaya zaidi.

Takribani watoto milioni 3.5 wanatarajiwa kukumbwa na unyafuzi mwaka huu, wakiwemo zaidi ya 700,000 ambao wanatarajiwa kukumbwa na unyafuzi mkali zaidi na hivyo kuhitaji tiba kamilifu ya kuokoa maisha yao.

Mkurugenzi Mtendaji wa UNICEF, Catherine Russell akinukuliwa kwenye taarifa hiyo amesema mchanganyiko hatari wa utapiamlo, ukimbizi na magonjwa unaongezeka kila siku na kwamba “tuna muda mdogo sana kuzuia vifo.”

Wanawake na watoto waliokimbia makazi yao katika eneo la Wakimbizi wa Ndani huko Darfur Magharibi kutokana na mapigano nchini Sudan.

Amesema “tunahitaji njia salama, endelevu na ha uhakika ya kufikisha misaada ya kiutu huko kwenye mapigano na mipakani na tunahitaij msaada wa kimataifa ili kuweza kuendeleza huduma na mifumo ambayo watoto wanategemea ili waweze kuishi.”

Ameongeza kuwa “hatuwezi kuwatelekeza watoto wa Sudan. Bila hatua ya dharura Sudan inaweza kuwa na janga la kizazi na zaidi ya yote, watoto wa Sudan wanahitaji sitisho la mapigano na amani.”

Maeneo ambako UNICEF inataka kufikia zaidi ni Darfur ambayo imeshuhudia mapigano makali zaidi na sasa ina wakimbizi zaidi ya theluthi moja ya watu wote milioni 8 waliofurushwa makwao tangu kuanza kwa mapigano Aprili mwaka jana.

UNICEF inasema inahitaji dola milioni 840 kufikia watu milioni 9.9 wakiwemo watoto milioni 7.6 walioko hatarini zaidi. Hadi sasa UNICEF imepokea asilimia 28 tu ya fedha hizo.

Source: UNICEF

Soma Zaidi hapa kuhusu tatizo la Utapiamlo,Chanzo,dalili na Tiba

Wakimbizi wa rohingya 5,000 wakiwemo watoto 3,500 kupoteza makazi yao baada ya moto mkubwa kuwaka kwenye kambi yao.

Shirika la Umoja wa Mataifa la kuhudumia watoto, UNICEF limesikitishwa na kitendo cha wakimbizi wa rohingya 5,000 wakiwemo watoto 3,500 kupoteza makazi yao baada ya moto mkubwa kuwaka kwenye kambi namba 5 ya makazi ya wakimbizi ya Cox’s Bazaar nchini Bangladesh.

Taarifa ya UNICEF iliyotolewa leo Dhaka, mji mkuu wa Bangladesh inasema moto huo uliwaka jana Januari 7, 2024 na kwamba hakuna ripoti zozote za vifo na zaidi ya yote hadi sasa hakuna taarifa zozote kuhusu chanzo cha moto huo.

UNICEF inasema ingawa hivyo takribani watoto 1,500 hawatakuwa na pahala pa kusomea kwani maeneo 20 ya kujifunzia yameteketezwa kwa moto. “Tunavyotathmini uharibifu uliotokea, UNICEF na wadau watajenga mahema ya muda kuwezesha watoto kujifunza wakati madarasa kamilifu yanajengwa,” imesema taarifa hiyo.

Kwa sasa UNICEF na wadau wanafanya kazi mchana na usiku kusadia watoto waliokumbwa na kiwewe pamoja na familia zao baada ya tukio hilo la moto.

“Hebu tukumbuke, ha watoto tayari wamekimbia ghasia na kiwewe. Kwa hiyo kuna umuhimu tena wa dharura kwa mamlaka za Bangladesh, Umoja wa Mataifa na wadau wengine kuwapatia mahitaji ya dharura wale walio hatarini zaidi ili watoto wote wawe salama, wawe na afya na walindwe,” imesema UNICEF kwenye taarifa yake.

UNHCR nayo yazungumza 

Wakati huo huo, Umoja wa Mataifa umesema shirika la Umoja wa Mataifa la kuhudumia wakimbizi UNHCR nalo limeungana na wadau wengine kusaidia manusura wa moto huo.

Akizungumza na waandishi wa habari jijini New York, Marekani hii leo, msemaji wa Umoja wa Mataifa Florencia Soto Nino amesema takribain makazi 800 yameteketezwa kwa moto huo pamoja na maenoe mengine 120 zikiwemo shule, misikiti na vituo vya afya.

Kwa sasa, wakimbizi ambao makazi yao yameungua, wamesaka hifadhi kwenye vituo vya kijamii kambini Cox’s Bazaar na wanapatiwa misaada ya dharura kama vile chakula.

Mamlaka za Bangladesh na UNHR wanaratibiana na shirika la Umoja wa Mataifa la uhamiaji, IOM na wadau wengine kusaidia wakimbizi hao wa Rohingya waliopoteza mali na makazi.