Kesi ya Benjamin Netanyahu imeanza kusikilizwa tena licha ya Vita vya Israel na Hamas

Waziri Mkuu wa Israel Benjamin Netanyahu anatazamiwa kuendelea na kesi yake ya muda mrefu kuhusu tuhuma za ufisadi, huku kesi hiyo ikirejelewa Jumatatu, Desemba 4, licha ya mzozo wa Gaza.

Kesi hiyo inayoendelea katika mahakama ya Jerusalem, itachunguza tuhuma mbalimbali za rushwa zilizowasilishwa dhidi ya Netanyahu mwaka wa 2019, zinazojulikana kama Kesi namba 1000, 2000 na 4000. Mashtaka hayo ni pamoja na ulaghai, hongo na uvunjaji wa uaminifu.

Netanyahu na mkewe Sara, wanatuhumiwa katika Kesi namba 1000 ya kupokea zawadi, ikiwa ni pamoja na shampeni na sigara, kutoka kwa mtayarishaji wa Hollywood Arnon Milchan na mfanyabiashara James Packer kwa kubadilishana na upendeleo wa kisiasa.

Kulingana na waendesha mashitaka, kati ya 2007 na 2016 Netanyahu alidaiwa kupokea zawadi za thamani ya shekeli 700,000 (dola 195,000), zikiwemo masanduku ya sigara, chupa za shampeni na vito mbali mbali.

Netanyahu, ambaye ni waziri mkuu wa kwanza wa Israel aliyeketi kujibu mashtaka, anakanusha makosa yoyote, akisema zawadi zilikubaliwa tu kutoka kwa marafiki na bila yeye kuziomba.

Anasema mashtaka hayo ni sehemu ya “Uwindaji wa wachawi” uliochochewa kisiasa unaoratibiwa na wapinzani na vyombo vya habari.

Kesi hiyo, iliyozinduliwa hapo awali Mei 2020, imekabiliwa na ucheleweshaji wa mara kwa mara, pamoja na mabishano kati ya upande wa utetezi na mashtaka,pamoja na usumbufu unaosababishwa na janga la COVID-19.

Usitishaji huo wa dharura uliwekwa na waziri wa sheria wa nchi hiyo katika kukabiliana na mzozo ulioanzishwa na Hamas tarehe 7 Oktoba.

Kurejeshwa kwa kesi hiyo kunakuja huku kukiwa na mzozo unaozingira mapendekezo ya Netanyahu ya kurekebisha mfumo wa mahakama.

Wakosoaji wanahoji kuwa mabadiliko hayo yangeiweka mahakama kuwa ya kisiasa, kuathiri uhuru wake, kukuza ufisadi na kuathiri vibaya uchumi wa Israeli.

Waziri Mkuu pia anashutumiwa kwa kutumia hatua za kisheria kuepusha changamoto zake za kisheria, na hivyo kuzidisha msukosuko wa kisiasa.