Miili ya watoto wawili kufanyiwa vipimo vya DNA Hanang

Maporomoko ya tope, magogo, mawe, maji na miti yalitokea alfajiri ya Desemba 2, 2023 katika Mji Mdogo wa Katesh, wilayani Hanang.

Dar es Salaam. Serikali imesema miili ya watoto wawili wa kike wa mwaka mmoja na miaka mitatu iliyoopolewa kwenye maporomoko ya tope mkoani Manyara, inafanyiwa vipimo vya vinasaba (DNA) ili kujiridhisha na utambuzi wake.

Vifo vya watu 87 vimethibitishwa na Serikali na miili ya wahusika imeshatambuliwa na kuchukuliwa na familia zao.

Hayo yameelezwa na Msemaji wa Serikali, Mobhare Matinyi kupitia taarifa aliyoitoa kwa umma leo Desemba 13,2023.

“Bado utafutaji unaendelea. Serikali inaendelea kugharamia mazishi na kutoa mkono wa pole wa Sh1 milioni kwa kila mwili kwa agizo la Rais Samia Suluhu Hassan,” amesema.

Kuhusu majeruhi, Matinyi amesema idadi inaendeelea kupungua na hadi kufikia saa tisa alasiri ya leo Desemba 13,2023 wamebakia  15 kutoka 139 waliofikishwa hospitalini na kupatiwa matibabu.

Amesema katika Hospitali ya Rufaa ya Mkoa wa Manyara majeruhi wapo tisa, Hospitali ya Wilaya ya Hanang (Tumaini) wapo watatu, na Kituo cha Afya Gendabi, watatu. Matibabu ya majeruhi wote yanagharamiwa na Serikali.

Kuhusu waathirika walio kwenye makambi, Matinyi amesema wamebaki 96 ambao Serikali inaendelea kuwaunganisha na ndugu zao.

Amesema kila kaya inayoondoka inapewa chakula na mahitaji muhimu ya kuwasaidia kuendelea na maisha.

“Hadi sasa waathirika 438 wa kaya 119 wameunganishwa na ndugu na jamaa zao. Kuna mchakato wa kuziunganisha na ndugu zao kaya zingine 31 zenye watu 96,” amesema.

Matinyi amesema Serikali kupitia Wizara ya Afya inaendelea kusimamia suala la afya kwa umma,  na kuhakikisha magonjwa ya mlipuko hayatokei katika eneo lote lililoathirika na maafa.

Amesema juhudi hizo zinahusisha kuzitembelea kaya, na hadi sasa kaya 5,410 zimeshafikiwa na dawa 102,405 za kutibu maji zimeshagawiwa.

“Waathirika wengine 1,853  wameshapatiwa msaada wa kisaikolojia na timu ya wataalamu wa Wizara ya Afya, wakiwamo wauguzi wawili, madaktari bingwa watatu wa afya ya akili na maofisa ustawi wa jamii 91 kutoka Wizara ya Maendeleo ya Jamii, Jinsia, Wanawake na Makundi Maalumu,” amesema.

Kwa wanaotaka kutoa msaada, amesema Kamati ya Maafa ya Taifa chini ya Ofisi ya Waziri Mkuu, imetoa akaunti ya benki ya kutuma fedha kwa mujibu wa Sheria ya Usimamizi wa Maafa Na. 6 ya mwaka 2022.

Serikali ya Tanzania jana Jumapili December 10, 2023, imetoa taarifa kuhusu maendeleo ya hali baada ya maafa ya maporomoko ya tope, mawe, magogo na maji kutoka Mlima Hanang Wilayani Hanang Mkoani Manyara ambapo imesema hadi kufikia sasa miili iliyopatikana ni 87 na yote imeshatambuliwa na Ndugu zao na kuchukuliwa kwa mazishi.

Mkurugenzi wa Idara ya Habari (Maelezo) na Msemaji Mkuu wa Serikali Dodoma, Mobhare Matinyi, amesema kwa maelekezo ya Rais, Dkt. Samia Suluhu Hassan, Serikali inagharamia mazishi yote na kutoa mkono wa pole wa Tsh. milioni moja kwa kila mwili ambapo kama Familia imepoteza Watu watano inapewa Tsh. milioni tano.

“Hadi sasa jumla ya majeruhi na Wagonjwa waliopokelewa tangu maafa yatokee ni 139 lakini waliopo Hospitalini hadi leo ni 30, Wagonjwa wengine wote isipokuwa wawili waliofariki wamesharuhusiwa kurejea nyumbani”

MUHIMBILI YAPELEKA MSAIKOLOJIA TIBA KATESH NA MSAADA WA DAWA ZA TZS. 38 MIL
Hospitali ya Taifa Muhimbili (MNH) imeungana na wananchi wa Mji mdogo wa Katesh Wilayani Hanang, Mkoani Manyara na kupeleka msaada wa dawa na vifaa tiba vyenye thamani ya TZS. 38 Mil ili kusaidia jitihada za utoaji huduma katika eneo hilo, ambalo hivi karibuni lilikumbwa na maafa ya mafuriko yaliyosababisha maporomoko ya udongo kutoka mlima Katesh na kuleta madhara makubwa ikiwemo vifo, majeruhi, upotevu wa mali na uharibifu wa miundombinu.

Akizungumza kwa Niaba ya Mkurugenzi Mtendaji wa MNH, Mkuu wa Idara ya Famasi, Mfamasia. Nelson Faustine amesema sambamba na msaada huo, Hospitali imetuma Msaikolojia Tiba kwenda kuungana na timu za watalam mbalimbali walioko kule wanaotoa huduma kwa waathirika wa mafuriko hayo.

Hatua hii pia ni kuitikia wito wa Rais wa Jamhuri ya Muungano wa Tanzania Mhe. Dkt. Samia Suluhu Hassan ambaye ameagiza kupelekea watalaam wa saikolojia kuzungumza na wananchi waliopata mfadhaiko kutokana na tukio hilo ili waweze kurejea katika hali ya kawaida.

Bodi ya Wadhamini, Menejimenti na Wafanyakazi wa Hospitali ya Taifa Muhimbili wanaendelea kutoa pole kwa wananchi wa Mji mdogo wa Katesh Wilayani Hanang, Mkoani Manyara kutokana na madhara waliyopata.

Rais wa Jamhuri ya Muungano wa Tanzania Mhe. Samia Suluhu Hassan akiwa amembeba mtoto Wina Joseph mwenye umri wa mwaka mmoja na miezi 8 ambaye pia yeye na mama yake ni waathirika wa mafuriko yaliyotokea Katesh Wilayani Hanang

Rais wa Jamhuri ya Muungano wa Tanzania Mhe. Dkt. Samia Suluhu Hassan amewajulia hali majeruhi waliolazwa katika Hospitali ya Tumaini Wilayani Hanang kwa kuwapa pole pamoja na kuwatakia afya njema.

Rais Dkt. Samia ameongozana na Mkuu wa Mkoa wa Manyara Mhe. Queen Sendiga, Naibu Waziri wa Afya Dkt. Godwin Mollel pamoja na Viongozi na Watendaji wengine.

Aidha Mhe. Rais Dkt. Samia amewapongeza wataalam wa afya kwa kuwahudumia vyema majeruhi pamoja na wagonjww wanaofika Hospitalini kwa ajili ya kupata matibabu.

“Madhara haya yaliyotokana na janga hilo [maporomoko Hanang] hadi sasa yamesababisha vifo 76 mpaka leo, majeruhi 117 na kaya 1,150 zenye wakazi wapatao 5,600 zimeathirika. Ekari 750 za mashamba zimeharibika, na pia kuna vifo vya mifugo” amesema Waziri wa Nchi Ofisi ya Waziri Mkuu, Sera, Bunge na Uratibu Mhe. Jenista Mhagama.