TMA yataja chanzo cha mvua zinazonyesha kwa Sasa,baadhi ya maeneo

Mamlaka ya Hali ya Hewa Tanzania (TMA) imesema, mvua zinazoendelea kunyesha tangu jana katika baadhi ya mikoa nchini zimetokana na kuongezeka kwa joto la bahari magharimbi mwa Bahari ya Hindi katika mwambao wa pwani wa nchi.

Mvua hizo ziliibua sintofahamu kutokana na majira ya Juni kuwa ya kipupwe, huku TMA ikitaja mikoa ambayo inapata mvua hizo.

Mikoa hiyo ni yote  ya ukanda wa Pwani,ukanda wa ziwa Victoria kwenye mikoa ya Kagera, Simiyu, Geita na Mara na maeneo ya Nyanda za juu Kaskazini Mashariki katika mikoa ya Kilimanjaro, Arusha na Manyara na Kaskazini mwa mkoa wa Kigoma.

Meneja wa Utabiri wa TMA, Dk Mafuru Kantamla leo Jumatano Juni 19, 2024 ameiambia Mwananchi Digital kwamba mvua hizo hazina madhara.

“Ni mvua za kawaida, kama itatokea mifumo ikasoma zitakuwa na madhara pia tutasema, watu waendelee kufuatilia utabiri kwa kuwa mifumo inapoimarika zaidi ndipo kunasababisha mvua kuwa nyingi kidogo, kwa sasa mifumo inaonyesha mvua hizi hazina madhara,” amesema.

Amesema, kwenye ukanda wa pwani mvua zitayesha leo Juni 19 na kesho Juni 20 kisha itapungua na vipindi vya jua vitaendelea kama kawaida baada ya siku hizo mbili.

“Hata mikoa mingine, si kama zitakuwa na muendelezo, mifumo inaonyesha ni za kutafuta na ilionekana katika msimu huu wa kipupwe pamoja na kuwa na vipindi vya ukavu na upepo mkali, kutakuwa na mvua kutokana na kuongezeka kwa joto Magharibi mwa Bahari ya Hindi.” amesema.

KIMBUNGA HIDAYA KINASOGEA HUKU KIKIPUNGUA NGUVU – TMA

Mamlaka ya Hali ya Hewa Tanzania (TMA) imetoa taarifa ya mwenendo wa kimbunga “HIDAYA” kilichopo karibu na maeneo ya Pwani ya nchi ambapo hadi kufikia saa 9 usiku wa kuamkia leo, Kimbunga “HIDAYA” kilikuwa katika eneo la bahari takribani kilomita 125 kutoka Pwani ya Kilwa (Mkoa wa Lindi), kilomita 93 kutoka pwani ya Mafia na kilomita 128 kutoka pwani ya Dar es Salaam kikiwa na mgandamizo wa hewa wa kiasi cha 985 hPa na kasi ya upepo unaofika kilomita 120 kwa saa.

Taarifa ya TMA imeeleza kuwa tangu usiku wa kuamkia leo, matukio ya upepo mkali na mvua kubwa zinazosababishwa na uwepo wa kimbunga “HIDAYA” yameendelea kujitokeza ambapo hadi kufika saa 3 asubuhi, kituo cha hali ya hewa cha Kilwa Masoko (Lindi) kimeripoti mvua ya jumla ya kiasi cha milimita 111.3 kwa kipindi cha masaa 6 yaliyopita.

Hata hivyo Kiwango hicho cha mvua ni kikubwa sana ukizingatia kuwa wastani wa mvua kwa mwezi Mei kwa kituo cha Kilwa Masoko ni milimita 96.6 tu.

TMA imesema kiasi cha mvua kilichonyesha ndani ya saa 24 katika kituo cha Kilwa Masoko ni takribani asilimia 115 ya wastani wa mvua kwa mwezi Mei kwa kituo cha Kilwa Masoko.

Viwango vya mvua vilivyopimwa katika vituo vingine katika kipindi hicho ni milimita 90.7 kwa Mtwara na milimita 85.3 katika kituo cha hali ya hewa Naliendele (Mtwara).

Kiwango cha mvua cha milimita 90.7 kilichonyesha Mtwara ndani ya saa 24 ni takribani asilimia 168 ya wastani wa mvua kwa mwezi Mei kwa Mtwara (milimita 54), vipindi vya mvua kubwa bado vinaendelea katika maeneo hayo ya ukanda wa Pwani ya Kusini.

Hata hivyo TMA imebainisha kuwa katika vituo vya hali ya hewa vya Mtwara, Kilwa, Zanzibar, Tanga na Dar es Salaam, upepo mkali unaozidi kilomita 50 kwa saa umeweza kupimwa katika nyakati tofauti kuanzia usiku wa kuamkia leo hadi asubuhi hii.

Aidha, kimbunga “HIDAYA” kinatarajiwa kuendelea kusogea karibu zaidi na ukanda wa pwani ya nchi yetu huku kikipungua nguvu taratibu kuelekea usiku wa kuamkia Jumapili tarehe 05 Mei 2024.

Via:ITV

TMA yatoa angalizo la mvua kubwa siku tatu mfululizo

Mamlaka ya Hali ya Hewa Tanzania (TMA) imetoa angalizo kwa wakazi wanaoishi ukanda wa Pwani ya Bahari ya Hindi ukiwamo Mkoa wa Dar es Salaam, kutokana na uwezekano wa kukutana na hali mbaya ya hewa kwa siku tano na mvua kwa siku tatu mfululizo.

Maeneo mengine yaliyotajwa na mamlaka hiyo kupitia utabiri wake ni mikoa ya Tanga, Pwani (ikijumuisha visiwa vya Mafia), Lindi, Mtwara pamoja na visiwa vya Unguja na Pemba.

Kwa mujibu wa taarifa iliyotolewa na taasisi hiyo leo Jumapili, Machi 17, 2024 imesema hali hiyo itakayosababisha mvua kubwa, imetabiriwa kuanza leo hadi Machi 21 mwaka huu.

“Zingatieni na jiandaeni. Athari zinazoweza kujitokeza ni pamoja na baadhi ya makazi kuzungukwa na maji, pamoja na kuathirika kwa baadhi ya shughuli za kiuchumi,” imeeleza taarifa hiyo iliyotolewa kwa umma.

Januari 20, 2024, mvua za El Nino zilinyesha na kusababisha changamoto kwa baadhi ya maeneo ikiwamo Mkoa wa Dar es Salaam.

Februari Mosi mwaka huu, mamlaka hiyo ilitoa utabiri wake ikieleza bado kuna viashiria vya mvua za El Nino hadi Aprili mwaka huu, kwa maeneo yanayopata mvua kwa msimu mmoja.

Mikoa 14 ilitajwa kukutana na hali hiyo ikiwemo, Rukwa, Katavi, Tabora, Kigoma, Singida, Dodoma , Songwe, Mbeya, Njombe, Iringa, Ruvuma, Mtwara, Lindi na Morogoro.

TMA:vipindi vya mvua kubwa vinaweza kujitokeza

Kaimu Mkurugenzi wa TMA, Dk Ladislaus Chang’a (kushoto) akitoa taarifa ya uchambuzi wa mwenendo wa mifumo ya hali ya hewa na mwelekeo wa msimu wa mvua za Masika katika kipindi cha Machi hadi Mei, 2024.

Kwa mujibu wa TMA mvua hizo zinatarajiwa kuisha mwishoni mwa Mei

Dar es Salaam. Mamlaka za maafa nchini zimeshauriwa kuendelea kuratibu utekelezaji wa mipango itakayosaidia kupunguza madhara yanayoweza kujitokeza kutokana na mvua za masika.

Mamlaka ya Hali ya Hewa (TMA) imetoa tahadhari ikieleza vipindi vya mvua kubwa vinaweza kujitokeza na kusababisha mafuriko na maporomoko ya ardhi, hivyo kusababisha uharibifu wa miundombinu, mazingira, upotevu wa mali na maisha.

Kaimu Mkurugenzi wa TMA, Dk Ladislaus Chang’a amesema hayo leo Februari 22, 2024 alipotoa taarifa ya uchambuzi wa mwenendo wa mifumo ya hali ya hewa na mwelekeo wa msimu wa mvua za Masika katika kipindi cha Machi hadi Mei, 2024.

TMA imesema kutakuwa na mvua za wastani hadi juu ya wastani kwa msimu wa masika, 2024 katika maeneo mengi ya nchi yanayopata misimu miwili ya mvua kwa mwaka. Ongezeko la mvua linatarajiwa Machi.

Dk Chang’a amesema mvua za masika zinatarajiwa kuanza wiki ya nne ya Februari katika maeneo mengi na zinatarajiwa kuisha wiki ya tatu na ya nne ya Mei, 2024 katika maeneo mengi.

Athari zinazotarajiwa

Amesema vipindi vya unyevu wa kuzidi kiasi na mafuriko vinaweza kujitokeza na kuathiri ukuaji wa mazao na miundombinu ya kilimo.

Pia, kina cha maji katika mito na mabwawa kinatarajiwa kuongezeka, na magonjwa ya mlipuko yanaweza kujitokeza kutokana na uchafuzi wa maji.

Amesema athari za kisekta na ushauri uliotolewa umeandaliwa na TMA kwa kushirikiana na wataalamu wa sekta husika katika mkutano wa wadau wa hali ya hewa uliofanyika Februari 19, 2024.

“Wadau wa sekta za kiuchumi na kijamii wanashauriwa kupanga na kutekeleza shughuli zao kwa kuzingatia taarifa mahususi za hali ya hewa zinazotolewa na TMA,” amesema.

Msimu wa mvua za masika ni mahususi kwa maeneo ya nyanda za juu kaskazini mashariki (Mikoa ya Arusha, Manyara na Kilimanjaro), pwani ya kaskazini (kaskazini mwa mkoa wa Morogoro, mikoa ya Pwani (ikijumuisha visiwa vya Mafia), Dar es Salaam, Tanga na visiwa vya Unguja na Pemba), ukanda wa Ziwa Victoria (Mikoa ya Kagera, Geita, Mwanza, Shinyanga, Simiyu na Mara) na kaskazini mwa mkoa wa Kigoma.

TMA imesema mvua za msimu zilizoanza Novemba, 2023 zimenyesha kwa kiwango cha juu ya wastani katika mikoa ya Dodoma, Singida, Kigoma, Tabora, Katavi, Iringa, Ruvuma, Lindi, Mtwara na kusini mwa mkoa wa Morogoro na wastani katika mikoa ya Rukwa, Mbeya, Songwe na Njombe katika kipindi cha Novemba, 2023 hadi Januari, 2024.

Amesema mvua hizi zilianza mapema wiki ya kwanza na ya pili ya Novemba, 2023 na zilitawaliwa na vipindi vya mvua nyingi zilizochangiwa na uwepo wa el-nino.

Katika kipindi kilichosalia cha msimu (Februari hadi Aprili, 2024), amesema mvua zinatarajiwa kuendelea kama ilivyotabiriwa Oktoba, 2023, ambapo kwa ujumla mvua zilitabiriwa kuwa za wastani hadi juu ya wastani.

Kuhusu joto

Dk Chang’a amesema joto la bahari la juu ya wastani linatarajiwa katika eneo la magharibi mwa Bahari ya Hindi (pwani ya Afrika Mashariki) ikilinganishwa na upande wa mashariki mwa Bahari ya Hindi.

Vilevile, joto la bahari la chini kidogo ya wastani linatarajiwa katika eneo la kusini mwa kisiwa cha Madagascar.

“Hali hii kwa pamoja inatarajiwa kuimarisha mifumo isababishayo mvua nchini kwa kuimarisha kasi na nguvu ya msukumo wa unyevunyevu kutoka baharini kuelekea katika maeneo ya pwani ya kaskazini na nyanda za juu kaskazini-mashariki,” amesema.

Katika eneo la mashariki mwa bahari ya Atlantiki (pwani ya Angola), amesema joto la bahari la chini kidogo ya wastani linatarajiwa.

“Hali hii inatarajiwa kuimarisha msukumo wa unyevunyevu kutoka misitu ya Congo kuelekea nchini hususan katika maeneo yanayozunguka ziwa Victoria, kaskazini mwa mkoa wa Kigoma na nyanda za juu kaskazini mashariki,” amesema.

Hata hivyo, amesema hali ya El-Nino inayoendelea katika Bahari ya Pasifiki inatarajiwa kupungua nguvu hususani kuelekea mwishoni mwa msimu wa mvua za masika.

Mkurugenzi Msaidizi Idara ya Menejimenti ya Maafa, Luteni Kanali Selestine Masalamado, amesema wamejipanga na wanaendelea kutoa elimu kwa mikoa iliyotabiriwa na kufuatilia utekelezaji wa maelekezo wanayotoa.

“Kama ambavyo tulifanya kwenye msimu wa mvua uliopita tumejipanga tuko tayari, tuna maghala ya vifaa vya kibidamu, kuna mfuko wa Taifa wa usimamizi wa maafa inapotokea tukio inaenda kusaidia.

“Tuna kamati za maafa katika ngazi zote, maghala ya vifaa vya kibinadamu katika kanda sita, mfuko wa taifa wa usimamizi wa maafa linapotokea tatizo tunakwenda kusaidia kama tulivyofanya kule Hanang,” amesema Luteni Kanali Masalamado.

Amesema pia watatoa taarifa ambayo itakuwa na maelekezo kwa sekta zote ili watambue cha kufanya pindi yatakapotokea maafa.

Kwa upande wake Meneja wa Wakala wa Barabara Mijini na Vijijini (Tarura) Mkoa wa Dar es Salaam, Geofrey Mkinga, amesema wamejipanga kukabiliana na changamoto zozote zitakazojitokeza wakati wa mvua za masika.

“Tunatambua tuko katika kipindi cha mvua kwa hiyo kama itatokea sehemu miundombinu ikaharibika kutokana na wingi wa mvua, tutaenda kutatua changamoto kwa haraka,” amesema Mkinga.

Ametoa wito kwa wananchi kuepuka kutumia mitaro kama jalala kwa sababu maji yakisambaa itakuwa ni changamoto.

“Wananchi wasifukie mitaro kwa kumwaga taka, wahakikishe inakuwa safi muda wote tusaidiane kwa pamoja kukabiliana na hali hiyo, kwa hiyo hili ni suala la pamoja si la taasisi peke yake wakazi wa Dar es Salaam tuone kwamba tunatunza mitaro yetu na mifereji na tusiigeuze jalala,” amesema.