TMA yataja chanzo cha mvua zinazonyesha kwa Sasa,baadhi ya maeneo

Mamlaka ya Hali ya Hewa Tanzania (TMA) imesema, mvua zinazoendelea kunyesha tangu jana katika baadhi ya mikoa nchini zimetokana na kuongezeka kwa joto la bahari magharimbi mwa Bahari ya Hindi katika mwambao wa pwani wa nchi.

Mvua hizo ziliibua sintofahamu kutokana na majira ya Juni kuwa ya kipupwe, huku TMA ikitaja mikoa ambayo inapata mvua hizo.

Mikoa hiyo ni yote  ya ukanda wa Pwani,ukanda wa ziwa Victoria kwenye mikoa ya Kagera, Simiyu, Geita na Mara na maeneo ya Nyanda za juu Kaskazini Mashariki katika mikoa ya Kilimanjaro, Arusha na Manyara na Kaskazini mwa mkoa wa Kigoma.

Meneja wa Utabiri wa TMA, Dk Mafuru Kantamla leo Jumatano Juni 19, 2024 ameiambia Mwananchi Digital kwamba mvua hizo hazina madhara.

“Ni mvua za kawaida, kama itatokea mifumo ikasoma zitakuwa na madhara pia tutasema, watu waendelee kufuatilia utabiri kwa kuwa mifumo inapoimarika zaidi ndipo kunasababisha mvua kuwa nyingi kidogo, kwa sasa mifumo inaonyesha mvua hizi hazina madhara,” amesema.

Amesema, kwenye ukanda wa pwani mvua zitayesha leo Juni 19 na kesho Juni 20 kisha itapungua na vipindi vya jua vitaendelea kama kawaida baada ya siku hizo mbili.

“Hata mikoa mingine, si kama zitakuwa na muendelezo, mifumo inaonyesha ni za kutafuta na ilionekana katika msimu huu wa kipupwe pamoja na kuwa na vipindi vya ukavu na upepo mkali, kutakuwa na mvua kutokana na kuongezeka kwa joto Magharibi mwa Bahari ya Hindi.” amesema.

Mahujaji 14 wa Hajj kufariki dunia kisa joto kali

Takriban raia 14 wa Jordan wamefariki dunia wakati wa ibada ya Hijja nchini Saudi Arabia kutokana na joto kali, maafisa wamesema.

Wizara ya mambo ya nje ya Jordan ilisema raia wake 14 wamefariki “baada ya kupigwa na jua sana kutokana na wimbi la joto kali” na wengine 17 wameripotiwa kupotea.

Kwa mujibu wa shirika la habari la AFP, Shirika la Red Crescent la Iran limethibitisha kuwa mahujaji watano wa Iran pia wamepoteza maisha, lakini haikueleza jinsi walivyofariki.

Maafisa wa Jordan walisema msako unaendelea kuwatafuta waliotoweka.

Katika taarifa yake wizara ya mambo ya nje ya Jordan ilisema kuwa inawasiliana na mamlaka ya Saudia kuhusu taratibu za kuzika au kusafirisha miili ya marehemu, kulingana na matakwa ya familia zao.

Hajj ni moja ya mikusanyiko mikubwa ya watu duniani ambapo zaidi ya mahujaji milioni 1.8 wanashiriki hijja mwaka huu, kulingana na maafisa wa Saudi.

Lakini ina historia ya majanga makubwa ikiwa ni pamoja na mikanyagano na moto wa mahema. Lakini kwa miaka mingi, changamoto kuu hutokana na joto kali.

Halijoto wiki hii ilizidi 46C (114.8F) na kufanya tamaduni nyingi zinazofanywa nje na kwa miguu kuwa na changamoto hasa kwa wazee

Via:Bbc

Zaidi ya watu 50 wamefariki dunia India kwa siku tatu zilizopita kutokana na hali ya joto kali

Zaidi ya watu 50 wamefariki dunia nchini India katika muda wa siku tatu zilizopita huku hali ya joto kali ikiendelea kukumba sehemu za nchi hiyo.

Takriban watu 33 walikufa katika jimbo la kaskazini la Uttar Pradesh mwishoni mwa juma kutokana na joto.

Katika jimbo la Odisha (Orissa), takriban watu 20 walikufa kutokanana wimbi kali la joto, afisa aliliambia shirika la habari la ANI.

Vingi vya vifo hivi viliripotiwa tarehe 1 Juni wakati India ilipopiga kura katika awamu ya mwisho ya upigaji kura kwa uchaguzi wake mkuu.

Matokeo ya uchaguzi huo yamepangwa kutangazwa tarehe 4 Juni.

Kila baada ya miaka mitano, India hufanya uchaguzi wake mkuu katika miezi ya kiangazi ya Aprili na Mei.

Lakini mwaka huu, hali ya joto imekuwa ikivunja rekodi, huku nchi ikikumbwa na mawimbi ya joto ya mara kwa mara, makali zaidi na marefu zaidi.

Wizara ya afya ya serikali kuu inasema kwamba kumekuwa na vifo 56 vilivyothibitishwa vya mawimbi ya joto kutoka 1 Machi hadi 30 Mei. Karibu visa 24,849 mawimbi ya joto viliripotiwa katika kipindi hicho.

El Niño yapelekea ongezeko la viwango vya njaa na utapiamlo Malawi

#PICHA:Majaribio ya upandaji maharagwe yanayostahimili ukame nchini Malawi. (Maktaba)

Takriban watu milioni tisa nchini Malawi wanakumbwa na athari mbaya za mafuriko na ukame unaosababishwa na El Niño hali iliyo haribu mavuno na kupelekea ongezeko la viwango vya njaa na utapiamlo.

Wakizungumza wakiwa mjini Blantyre nchini Malawi, Mratibu wa Umoja wa Mataifa wa masuala ya Mgogoro wa Mabadiliko ya Tabianchi na El Niño Bi. Reena Ghelani, Mkurugenzi wa wa Shirika la Umoja wa Mataifa la Mpango wa Chakula Duniani WFP Dkt. Menghestab Haile na Mkurugenzi la shirika la Umoja wa Mataifa la Chakula na Kilimo FAO nchini humo Dkt. Patrice Talla wamesisitiza umuhimu mkubwa wa msaada wa kimataifa kwa Serikali na watu kwa Malawi.

kufuatia Rais wa Malawi kutangaza janga la kitaifa viongozi hao kwa pamoja wamefanya ziara maalum nchini humo na kukutana na wadau wa masuala ya kibinadamu na maendeleo, pamoja na maafisa wa Serikali, ikiwa ni pamoja na mamlaka ya Usimamizi wa Hatari za Maafa.

Alipokutana na washirika wa kibinadamu na maendeleo, Dk. Menghestab Haile alisema kuwa “Ni jambo la kusikitisha kuona wakulima wakiwa wamekata tamaa kutokana na ukame, ambao siyo kosa lao kwani walipanda wakitarajia mazuri lakini mvua haikutosha.” Alielezea kuwa hakutakuwa na chochote cha kuvuna na jamii hizi zitakabiliana na njaa kali kwa mwaka mwingine msaada usipoongezwa, hali ambayo inaweza kuwa mbaya zaidi kufuatia upungufu wa akiba ya chakula na kuongezeka kwa bei ya mahindi.

Kipindi hiki cha El Niño kinatokea wakati msururu wa majanga na hatari umeongezeka, na kuathiri sana maendeleo ya Malawi kwani  hapo awali, zaidi ya watu milioni 2.2 walikumbwa na kimbunga kilichoharibu miundombinu muhimu nchini humo, kilichofuatiwa  mlipuko mbaya zaidi wa kipindupindu.

Kwa upande wake Dkt. Talla kutoka FAO alieleza kuwa “Viwango na mfululizo wa gharama ya athari za mabadiliko ya tabianchi zinatoa msisitizo wa umuhimu wa kuongeza usaidizi katika kujiandaa na kupambana na mabadiliko ya tabianchi pamoja na mnepo.”

Naye Dkt Ghelani anahimiza uwekezaji katika kusaka suluhisho endelevu zinazolenga kushughulikia mizizi ya udhaifu pamoja na kuipa kipaumbele misaada ya dharura ya wakati uliopo. Vilevile amehimiza kuungwa mkono jamii za Malawi ili kujenga mustakabali wa dhabiti na usalama wa chakula.

Msaada zaidi unahitajika

Ukame umeathiri vibaya mavuno ya mahindi ya msimu huu, na kusababisha upungufu unaokadiriwa kuwa asilimia 45 ikilinganishwa na wastani wa miaka mitano. Ifikapo mwisho wa mwaka huu, inatabiriwa takriban asilimia 40 ya watu watakumbwa na njaa kali.  Aidha, takriban watu 14,000 walihamishwa kutokana na mafuriko na maporomoko ya ardhi katika sehemu ya kaskazini mwa nchi.

Ingawa Serikali ya Malawi imetoa ombi zaidi la msaada katika kupatiwa msaada kwenye mkakati wake wa umwagiliaji wa kitaifa, juhudi hizi zinakwamishwa na upungufu wa fedha kwani ni asilimia 40 tu ya fedha zilizohitajika kwa mwaka 2023 zilizopatikana.

Mwishoni mwa mwaka 2023, Mfuko Mkuu wa Umoja wa Mataifa wa Kukabiliana na Dharura ulitoa dola milioni 4 kusaidia watu walioathiriwa na majanga ya tabianchi na hivi karibuni ilitangaza dola milioni 13.5 za ziada kusaidia juhudi za kukabiliana na El Niño katika ukanda wa Kusini mwa Afrika. Hata hivyo bado kuna mengi zaidi yanahitaji kufanyika.

Via:UN

#PICHA:Wafanyakazi wa Shirika la Msalaba Mwekundu nchini Kenya wakiwa katika harakati za uokoaji kufuatia mafuriko.

MAMLAKA nchini Kenya zimesema kuwa idadi ya watu waliofariki kufuatia mafuriko imeongezeka hadi kufikia watu 228.

Tangu siku ya Jumamosi, watu tisa wameripotiwa kufariki huku jumla ya wengine 223,198 wakiathirika na mafuriko hayo. Hata hivyo serikali imetangaza mipango ya kupunguza athari za mafuriko hayo.

Aidha, Msemaji wa serikali ya Kenya, Isaac Mwaura amesema tayari amewahamisha watu 163,000 na kuwapeleka katika maeneo salama.

Kwa mujibu wa Umoja wa Mataifa, tangu mwezi Machi, mvua kubwa na mafuriko vimesababisha uharibifu mkubwa katika nchini za Kenya, Tanzania, Burundi, Somalia, Rwanda na maeneo mengine ya Afika Mashariki.

DW