afyatips
Vyakula na Matunda Vinavyoweza Kusaidia Kuondoa Kiu na Kuongeza Maji Mwilini
Vyakula na Matunda Vinavyoweza Kusaidia Kuondoa Kiu na Kuongeza Maji Mwilini
Kiu ni ishara ya kawaida kwamba mwili unahitaji maji. Ingawa maji ya kunywa ndiyo chanzo muhimu zaidi cha unyevu mwilini, si lazima maji yote yanayotumiwa na mwili yatoke kwenye glasi ya maji. Ushahidi kutoka National Academies of Sciences, Engineering, and Medicine unaonyesha kwamba maji yanayotoka kwenye vyakula pia huchangia sehemu ya maji ambayo mwili hupata kila siku. Kwa wastani, takribani asilimia 20 ya maji ya mwili yanaweza kutoka kwenye vyakula, huku sehemu kubwa ikitoka kwenye vinywaji.
A.Vyakula Vinavyoweza Kusaidia Kuondoa Kiu na Kuongeza Maji Mwilini
Kiu ni moja ya ishara kuu kwamba mwili unahitaji maji. Watu wengi wanapofikiria kuongeza maji mwilini, hufikiria kunywa maji pekee. Lakini ukweli wa kisayansi ni kwamba maji tunayopata kwenye chakula pia huchangia katika jumla ya maji ambayo mwili hupokea kila siku.
National Academies of Sciences, Engineering, and Medicine inaeleza kwamba takribani asilimia 20 ya maji yote mwilini yanaweza kutoka kwenye vyakula, hasa vyakula vyenye maji mengi. Hivyo, baadhi ya vyakula vinaweza kusaidia kupunguza kiu na kuongeza maji mwilini.
Tuangalie Sasa baadhi ya Vyakula hivo Katika Makala hii;
1. Supu
Supu ni miongoni mwa vyakula vinavyoweza kusaidia kuongeza maji mwilini kwa sababu sehemu kubwa yake huwa ni maji. Supu ya mboga, supu ya kuku au supu yenye kunde inaweza kukupa maji pamoja na virutubisho vingine.
NHS inapendekeza vyakula vyenye kiwango kikubwa cha maji, ikiwemo supu, kama sehemu ya kusaidia mtu kuongeza maji mwilini.
Hata hivyo, ni vizuri kuepuka supu yenye chumvi nyingi, kwa sababu ulaji mkubwa wa chumvi unaweza kuongeza kiu kwa baadhi ya watu.
2. Nyanya
Nyanya pia ina kiwango kikubwa cha maji na inaweza kusaidia kuongeza maji mwilini. Unaweza kula nyanya mbichi kwenye saladi au kuitumia katika mboga na vyakula vingine.
Faida yake ni kwamba pamoja na maji, nyanya pia ina virutubisho mbalimbali, ikiwemo lycopene, ambayo ni antioxidant.
3. Mboga za majani
Mboga kama mchicha, matembele pamoja na mboga nyingine za majani zinaweza kuchangia maji mwilini, hasa zinapoliwa zikiwa fresh au kupikwa bila kukausha maji yote.
Harvard inaeleza kwamba mboga na matunda ni miongoni mwa vyanzo muhimu vya maji kutoka kwenye chakula, huku mboga za majani zikiwa miongoni mwa vyakula vyenye maji mengi.
4. Viazi vilivyopikwa
Viazi si chakula ambacho watu wengi hukifikiria tunapozungumzia kuongeza maji mwilini, lakini viazi vilivyopikwa vina takribani asilimia 75 ya maji, kulingana na Takwimu(data) za National Academies.
Kwa hiyo, viazi vilivyopikwa vinaweza kuchangia maji mwilini pamoja na kutoa wanga unaotumika kama chanzo cha nishati.
5. Maziwa Fresh na mtindi
Maziwa yana kiwango kikubwa cha maji; National Academies inaonyesha kuwa maziwa yenye mafuta asilimia 2 yana takribani asilimia 89 ya maji.
Pia,Maziwa fresh na mtindi hutoa protini, calcium na virutubisho vingine.
6. Maharage na vyakula kama Ndizi Zilizopikwa kwa maji
Maharage yaliyopikwa, dengu na kunde huwa na maji mengi zaidi kuliko yakiwa mabichi au Makavu kwa sababu huongezwa maji wakati wa kupikwa.
Kwa mfano, vyakula kama Ndizi,kunde vilivyopikwa vinaweza kuwa sehemu ya mlo wenye unyevu, hasa vinapopikwa kama mchuzi au supu badala ya kukaushwa kabisa.
7. Uji
Uji nao unaweza kusaidia kuongeza maji mwilini kwa sababu hutengenezwa kwa kuchanganya nafaka na maji. Kiasi cha maji kitategemea jinsi uji ulivyotengenezwa—uji mwepesi wenye maji mengi utachangia maji zaidi kuliko uji mzito sana.
Uji wa nafaka kama ule wa mahindi, ulezi au mtama unaweza pia kutoa nishati na virutubisho, hivyo unaweza kuwa chaguo zuri wakati wa kifungua kinywa.
Je, vyakula vinaweza kuchukua nafasi ya maji ya kunywa?
Hapana, si katika hali zote. Vyakula vyenye maji mengi vinaweza kuongeza kiasi cha maji mwilini, lakini maji ya kunywa bado ni chanzo muhimu cha unyevu unyevu mwilini.
Harvard inaeleza kwamba maji ndiyo chaguo bora kwa watu wengi, huku vyakula vyenye maji mengi vikichangia takribani asilimia 20 ya jumla ya maji yanayotumiwa.
NHS pia inashauri kunywa maji mara kwa mara na kuongeza unywaji wake wakati wa joto, mazoezi, kutapika, kuharisha au hali nyingine zinazoweza kusababisha upotevu wa maji mwilini.
Kwa hiyo, kama una kiu, unaweza kula tango, nyanya, mboga za majani, supu, uji, viazi vilivyopikwa, ndizi zilizopikwa,Uji, maziwa fresh au mtindi ili kuongeza maji yanayotokana na chakula, lakini usisubiri chakula pekee kumaliza kiu. Kunywa maji ya kutosha bado ni muhimu zaidi.
Ushahidi muhimu kwa ufupi
Ushahidi wa National Academies unaonyesha kwamba maji kutoka kwenye chakula ni sehemu halisi ya jumla ya maji mwilini, na jedwali lao la vyakula linaonyesha kiwango kikubwa cha maji katika vyakula kama;
- lettuce (96%),
- broccoli iliyopikwa (89%),
- maziwa (89%),
- viazi vilivyookwa (75%),
- mahindi yaliyopikwa (70%)
- na pasta iliyopikwa (66%).
Hivyo, vyakula vya kusaidia kupunguza kiu si matunda pekee. Mboga, supu, uji, maziwa, mtindi, viazi, mahindi na vyakula vingine vilivyopikwa kwa maji vinaweza pia kuchangia katika kuongeza maji mwilini.
B.Matunda yanayoweza Kusaidia Kuondoa Kiu na Kuongeza Maji Mwilini
1. Tikiti maji
Tikiti maji ni moja ya tunda linalofaa wakati wa kiu kwa sababu lina kiasi kikubwa cha maji. Kula vipande vya tikiti maji kunaweza kuongeza maji mwilini pamoja na kukupa virutubisho.
Hata hivyo, ni muhimu kuelewa kwamba tikiti maji halipaswi kuchukuliwa kama mbadala kamili wa kunywa maji, hasa wakati mtu ana kiu kali, anatoka jasho nyingi au amepungukiwa maji.
Bado Nafasi ya maji kama maji ni muhimu sana kwako,Hivo unapaswa kunywa maji ya kutosha kila siku.
2. Tango
Tango ni tunda lenye maji mengi sana. Takwimu zilizotajwa na vyanzo vya lishe zinaonyesha kuwa tango lina takribani asilimia 95–96 ya maji.
Unaweza kula tango kama sehemu ya kachumbari, kulichanganya na nyanya au kula vipande vyake kama kitafunwa. Harvard T.H. Chan School of Public Health inalitaja tango miongoni mwa matunda yenye maji mengi yanayoweza kuchangia kuongeza maji kila siku.
3. Machungwa
Machungwa yana maji pamoja na virutubisho mbalimbali, hivyo yanaweza kusaidia kuongeza maji mwilini. Matunda kama machungwa yanaweza kuwa chaguo zuri hasa kwa mtu ambaye hapendi kunywa maji mengi mara kwa mara.
Ni bora kula tunda zima kuliko kutegemea juisi yenye sukari nyingi, kwa sababu tunda zima pia lina nyuzinyuzi.
4. Nanasi
Nanasi lina kiasi kikubwa cha maji na linaweza kusaidia kuongeza maji mwilini,
Lakini kama kiu inatokana na joto kali, mazoezi makali au kutokwa jasho nyingi, kula nanasi pekee hakutoshi kuchukua nafasi ya maji au vinywaji vinavyohitajika kurejesha maji mwilini.
Je, Matunda haya yanaweza kuchukua nafasi ya maji ya kunywa?
Kwa kawaida, hapana. Matunda yenye maji mengi yanaweza kusaidia kuongeza maji mwilini, lakini maji ya kunywa bado ni njia rahisi na muhimu ya kukidhi mahitaji ya maji mwilini.
Mahitaji ya maji hayatakuwa sawa kwa kila mtu. Mtu anayefanya kazi ngumu, anayefanya mazoezi, anayeishi kwenye mazingira ya joto au anayepoteza maji kwa kutapika au kuharisha anaweza kuhitaji maji zaidi.
Kwa mtu mwenye kiu ya kawaida, anaweza kutumia mchanganyiko wa maji ya kunywa na vyakula vyenye maji mengi. NHS inapendekeza kunywa maji mara kwa mara na kutumia rangi ya mkojo kama ishara mojawapo ya kuangalia hali ya maji mwilini—Mfano mkojo wenye rangi ya njano iliyokolea huweza kuonyesha upungufu wa maji mwilini,Lakini ukiwa na rangi ya njano iliyopauka au mweupe kwa ujumla huashiria hali nzuri ya unyevu unyevu mwilini.
References:
- National Academies – Dietary Reference Intakes for Water
- National Academies – Water, Salt and Potassium Report
- NHS – Dehydration
- National Academies – Dietary Reference Intakes for Water:National Academies – Water and Selected Foods
- Harvard T.H. Chan School of Public Health – How Much Water Do You Need?
Harvard Nutrition Source – Water
