Mwanaume Akutwa na Sindano Nyingi Ndani ya Mwili, Moja Ikiwa Karibu na Moyo

Tukio la Kushangaza Limeripotiwa nchini China baada ya madaktari kumgundua mwanaume mwenye umri wa miaka 35 akiwa na vitu vingi vya metali vyenye umbo la sindano katika sehemu mbalimbali za mwili wake, ikiwemo karibu na moyo, tumbo, nyonga, kibofu cha mkojo na uume.

Mwanaume huyo alifika hospitalini baada ya kupata maumivu wakati wa kukojoa pamoja na damu kwenye mkojo (hematuria). Licha ya dalili hizo, hali yake kwa ujumla ilikuwa tulivu na hakuwa na dalili za kawaida za tatizo la moyo kama maumivu ya kifua au kupumua kwa shida.

Uchunguzi wa CT ulionyesha vitu vya metali ndani ya mwili

Wakati wa uchunguzi wa awali, madaktari waliona kitu kisicho cha kawaida katika eneo la moyo. Hali hiyo ilisababisha kufanyika kwa CT scan yenye contrast ya kifua, tumbo na nyonga.

Matokeo yalionyesha uwepo wa vitu vingi vya metali vyenye umbo la sindano katika maeneo mbalimbali, ikiwemo ukuta wa tumbo, nyonga, kibofu cha mkojo, maeneo yanayozunguka mifupa ya nyonga na kwenye uume.

Kilichowatia madaktari wasiwasi zaidi ni sindano yenye urefu wa takribani sentimita 3.6 (mm 36) iliyokuwa imepenya utando unaozunguka moyo, unaoitwa pericardium, na kufika upande wa ventrikali ya kushoto ya moyo. Uchunguzi wa echocardiography ulionyesha kuwa sindano hiyo ilikuwa ikisogea sambamba na mapigo ya moyo.

Kwa nini sindano hiyo ilikuwa hatari?

Kitu cha chuma kilichokuwa karibu na moyo kinaweza kusababisha madhara makubwa endapo kitaendelea kusogea au kuharibu tishu za moyo. Pia kuna hatari ya kutokwa damu, maambukizi au matatizo mengine kutokana na uwepo wa kitu cha kigeni ndani ya mwili.

Kwa sababu hiyo, madaktari waliona ni muhimu kushughulikia kwanza kitu kilichokuwa karibu zaidi na moyo.

Madaktari walifanikiwa kukiondoa kwa upasuaji. Ripoti ya kesi inaeleza kuwa sindano hiyo ilikuwa imeharibika kwa kutu, hali iliyodokeza kuwa huenda ilikuwa imekaa ndani ya mwili kwa muda mrefu.

Vitu vingine viliondolewa au kufuatiliwa

Baadhi ya vitu vingine vilikuwa katika maeneo ambayo kuviondoa mara moja kungeweza kusababisha madhara zaidi, kama vile kutokwa damu au kuvuja kwa mkojo.

Kwa hiyo, madaktari walifanya tathmini ya hatari na faida kabla ya kuamua kama kila kitu kilipaswa kuondolewa. Vitu vilivyokuwa na hatari kubwa zaidi vilishughulikiwa, huku vingine vikifuatiliwa kwa karibu.

Madaktari walihisi huenda vitu hivyo vilijingizwa na mgonjwa mwenyewe

Mwanaume huyo alikuwa na historia ya ulemavu wa kiakili tangu utotoni, jambo lililofanya kupata historia kamili kuhusu jinsi vitu hivyo vilivyoingia mwilini kuwa changamoto.

Aidha, ripoti ilieleza kuwa miaka miwili kabla ya tukio hili, alikuwa amewahi kufanyiwa matibabu katika hospitali nyingine ambapo vitu viwili vya kigeni viliondolewa kwenye tumbo lake.

Historia hiyo iliwaongoza madaktari kufikiria uwezekano wa tabia inayojulikana kitabibu kama self-embedding behavior (SEB) — hali ambayo mtu huingiza kwa makusudi vitu vya kigeni ndani ya tishu za mwili.

Self-embedding behavior ni nini?

Self-embedding behavior ni aina nadra ya kujidhuru ambapo mtu huingiza vitu vyenye ncha kali au vitu vingine ndani ya mwili, mara nyingi kwenye tishu laini. Vitu vilivyoripotiwa katika tafiti mbalimbali ni pamoja na sindano, pini, waya na vitu vingine vidogo.

Utafiti mmoja wa mapitio ya kesi za watu wazima ulibaini kuwa hali hii ni nadra na inaweza kuhusishwa na matatizo mbalimbali ya afya ya akili, ingawa si kila mtu anayefanya tabia hiyo huwa na utambuzi wa ugonjwa fulani wa akili.

Kwa sababu hiyo, mtu anayegundulika kuwa na tabia ya kujichomeka au kujipachika vitu mwilini anahitaji tathmini ya kitabibu na afya ya akili, badala ya kuangaliwa suala hilo kama tatizo la upasuaji pekee.

Vitu vya kigeni ndani ya mwili vinaweza kusababisha madhara gani?

Kulingana na sehemu vilipo, vitu vya kigeni vinaweza kusababisha:

• Maambukizi.
• Kutokwa damu.
• Kuharibu mishipa ya damu au viungo.
• Maumivu na kuvimba.
• Kuharibu kibofu cha mkojo au njia ya mkojo.
• Kuathiri utendaji wa moyo iwapo kitu kiko karibu na moyo.
• Kuhitaji upasuaji au kuondolewa kwa kutumia njia maalumu za kitabibu.

Tafiti za kitabibu zinaonyesha kwamba eneo, ukubwa na aina ya kitu cha kigeni huathiri sana uamuzi wa namna ya kukiondoa. Katika baadhi ya mazingira, kujaribu kukiondoa kunaweza kuwa na hatari kubwa kuliko kukiacha na kukifuatilia kwa karibu.

Hali ya mgonjwa baada ya matibabu

Baada ya kuondolewa kwa sindano iliyokuwa karibu na moyo, mgonjwa alifuatiliwa kutokana na madhara yaliyokuwa tayari yametokea kwenye moyo. Ripoti ya kesi inaeleza kuwa hali ya moyo ilibadilika baada ya upasuaji lakini baadaye iliimarika, na katika ufuatiliaji wa miezi tisa mgonjwa alikuwa katika hali thabiti.

Kesi hii inaonyesha umuhimu wa uchunguzi wa kina pale mgonjwa anapokuwa na dalili zisizoeleweka kama damu kwenye mkojo au maumivu wakati wa kukojoa. Pia inaonyesha kwamba vitu vya kigeni vilivyo ndani ya mwili vinaweza kusababisha madhara makubwa kulingana na mahali vilipo, hasa vinapokuwa karibu na viungo muhimu kama moyo.

Aidha, pale madaktari wanapogundua kujirudia kwa tabia ya kuingiza vitu mwilini, ni muhimu kufanya tathmini ya kitabibu na afya ya akili ili kubaini sababu zinazoweza kuwa nyuma ya tabia hiyo na kusaidia kuzuia kujirudia kwake.

References

1. Liu et al. (2026). Multi-organ needle foreign bodies with postoperative left ventricular apical outpouching and suspected mural thrombus: a case report. BMC Cardiovascular Disorders.
2. Young, A. S., Shiels, W. E., Murakami, J. W., Coley, B. D., & Hogan, M. J. (2010). Self-embedding behavior: Radiologic management of self-inserted soft-tissue foreign bodies. Radiology, 257(1), 233–239.
3. Bennett, G. H., Shiels, W. E., Young, A. S., Lofthouse, N., & Mihalov, L. (2011). Self-embedding behavior: A new primary care challenge. Pediatrics, 127(6), e1386–e1391.
4. Mannarino, V. S., Pereira, D. C. S., Gurgel, W. S., Costa, C. B. F., Valença, A. M., Fontenelle, L. F., & Mendlowicz, M. V. (2017). Self-embedding behavior in adults: A report of two cases and a systematic review. Journal of Forensic Sciences.
5. Yousafzai, A. W., & Chaudhry, J. (2016). Self-Embedding Behavior (SEB): A Case Report and Review of Literature. Khyber Medical University Journal, 8(1).