Vipimo vya Vinasaba kutumika kutambua waliofariki kwa Ajali Morogoro

Vipimo vya Vinasaba kutumika kutambua waliofariki kwa Ajali Morogoro

Mkemia Mkuu wa Serikali, Dk. Fidelice Mafumiko, amewataka ndugu wa watu waliofariki katika ajali ya Mkambalani, mkoani Morogoro, kufika Hospitali ya Rufaa ya Mkoa wa Morogoro kusaidia zoezi la utambuzi wa miili ya marehemu kwa kutumia vipimo vya vinasaba.

Ajali hiyo imesababisha vifo vya watu 32 na wengine 30 kujeruhiwa, huku mamlaka husika zikiendelea na hatua za kubaini utambulisho wa waliofariki kwa kutumia vipimo vya vinasaba.

Dk. Mafumiko amesema zoezi la utambuzi linahusisha hatua mbili kuu, ambazo ni uchunguzi wa miili iliyopatikana na uchukuaji wa sampuli kutoka kwa ndugu wa marehemu kwa ajili ya kulinganisha vinasaba na kuthibitisha utambulisho wa miili hiyo.

Amesema Ofisi ya Mkemia Mkuu wa Serikali itaendelea kushirikiana na uongozi wa Hospitali ya Rufaa ya Mkoa wa Morogoro pamoja na Mganga Mkuu wa Mkoa kuhakikisha zoezi hilo linafanikiwa.

Naye, Mganga Mkuu wa Hospitali ya Rufaa ya Mkoa wa Morogoro, Dkt. Best Magoma, amesema hospitali hiyo inaendelea kutoa huduma za matibabu kwa majeruhi wa ajali hiyo waliolazwa katika kituo hicho.

Ajali hiyo ilitokea eneo la Mkambalani katika barabara kuu ya Morogoro–Dar es Salaam, ikihusisha lori aina ya Scania lililokuwa limebeba miti na basi la abiria mali ya kampuni ya Green Line.

Vyombo hivyo vya usafiri viligongana uso kwa uso, na kusababisha moto mkubwa ulioteketeza basi hilo. Moto huo ulisababisha baadhi ya miili ya waliofariki kuharibika vibaya, hali inayofanya utambuzi wa marehemu kwa kutumia vinasaba kuwa muhimu. Credits:ITV.